ନୂଆଦିଲ୍ଲୀ,୩।୧ : ଭାରତୀୟ ସମ୍ବିଧାନ କ୍ଲବରେ ଗଣମାଧ୍ୟମକୁ ସମ୍ବୋଧିତ କରି ଡିସେମ୍ବର ୩ ତାରିଖ ଦିନ ଶଙ୍କରାଚାର୍ଯ୍ୟ ସ୍ବାମୀ ଅଭିମୁକ୍ତେଶ୍ୱରାନନ୍ଦ କହିଛନ୍ତି ଯେ ଧର୍ମ ଶୋଧନ ସେବାଳୟ (ଧର୍ମ ସେନ୍ସର ବୋର୍ଡ) ଗଠନ କରାଯାଇଛି। ଏଥିରେ ୧୧ ଜଣ ସଦସ୍ୟ ଅଛନ୍ତି। ଧର୍ମ ସେନ୍ସର ବୋର୍ଡର ମୁଖ୍ୟ କାର୍ଯ୍ୟାଳୟ ଦିଲ୍ଲୀ-ଏନସିଆରରେ ହେବ। ଖୁବ ଶୀଘ୍ର ଏହାର କାର୍ଯ୍ୟାଳୟ ସବୁ ରାଜ୍ୟ ଏବଂ ଜିଲାରେ ଆରମ୍ଭ ହେବ। ଜାନୁଆରୀ ୧୫ରେ ଦିଲ୍ଲୀ କାର୍ଯ୍ୟାଳୟ ଆରମ୍ଭ ହେବ। ପ୍ରୟାଗରାଜ ଠାରେ ଅନୁଷ୍ଠିତ ହେବାକୁ ଥିବା ମାଘମେଳାରେ ଚଳଚ୍ଚିତ୍ର ନିର୍ମାତାମାନଙ୍କ ପାଇଁ ଧର୍ମ ସେନ୍ସର ବୋର୍ଡ ଦ୍ୱାରା ଏକ ବିସ୍ତୃତ ଗାଇଡ ଲାଇନ ଜାରି କରାଯିବ। ଏହି ବୋର୍ଡ ଚଳଚ୍ଚିତ୍ର, ଟିଭି ଏବଂ ଓଟିଟି ପ୍ଲାଟଫର୍ମରେ ପ୍ରଦର୍ଶିତ ଧାର୍ମିକ ଚରିତ୍ର, ସେମାନଙ୍କର ସଂଳାପ, ରଙ୍ଗ, ତିଲକ ସ୍କ୍ରିପ୍ଟ ସମୀକ୍ଷା କରିବ। ଯଦି କୌଣସି ଚଳଚ୍ଚିତ୍ରରେ ହିନ୍ଦୁ ଧର୍ମ, ବେଦ ଏବଂ ପୁରାଣର ଜିନିଷଗୁଡିକ ବିକୃତ ଢଙ୍ଗରେ ଦେଖାଯାଏ, ତେବେ ବୋର୍ଡ ଏହା ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବ। ଏହା ବ୍ୟତୀତ ଏହି ବୋର୍ଡ ବିଦ୍ୟାଳୟରେ ଶିକ୍ଷାଦାନ କରାଯାଉଥିବା ପାଠ୍ୟକ୍ରମ, ନାଟକ ଏବଂ ବିଭିନ୍ନ ଧାର୍ମିକ ଅଭିନୟର ମଞ୍ଚସ୍ଥର ସମୀକ୍ଷା ମଧ୍ୟ କରିବ। ଧାର୍ମିକ ସେନ୍ସର ବୋର୍ଡ ଧ୍ସନ୍ଥ ସମାଜ, ଧାର୍ମିକ ଅନୁଷ୍ଠାନ, ଦେଶର ଧାର୍ମିକ ପୁସ୍ତକ ଉପରେ ଦିଆଯାଇଥିବା ବିବୃତ୍ତି ଏବଂ ଭାଷଣ ଉପରେ ନଜର ରଖିବ ଏବଂ ଏହାର ସମୀକ୍ଷା କରିବ।
ବୋର୍ଡ ଗଠନ ପରେ ଏହାର ସୂଚନା ସମସ୍ତ ଚଳଚ୍ଚିତ୍ର ନିର୍ମାତାଙ୍କୁ ଦିଆଯିବ ବୋଲି ଅଭିମୁକ୍ତେଶ୍ୱରାନନ୍ଦ କହିଛନ୍ତି। ଯାହାଦ୍ୱାରା ସେହି ଲୋକମାନେ କୌଣସି ଧର୍ମ-ଇତିହାସ ସମ୍ବନ୍ଧୀୟ ଚଳଚ୍ଚିତ୍ର ନିର୍ମାଣ କରିବା ପୂର୍ବରୁ ଆମ ସହିତ ଯୋଗାଯୋଗ କରିବେ। ଆମେ ଚଳଚ୍ଚିତ୍ର ନିର୍ମାତାମାନଙ୍କୁ ଧର୍ମ-ସମାଜ ଏବଂ ଇତିହାସ ସହ ଜଡିତ ସମସ୍ତ ତଥ୍ୟ ଏବଂ ସୂଚନା ପ୍ରଦାନ କରିବୁ। ଯାହା ଆଧାରରେ ସେମାନେ ଫିଲ୍ମ ପ୍ରସ୍ତୁତ କରିପାରିବେ। ଏହା ବ୍ୟତୀତ ଚଳଚ୍ଚିତ୍ର ନିର୍ମାତାମାନଙ୍କୁ ଧାର୍ମିକ ଚରିତ୍ର ଏବଂ ସେମାନଙ୍କ ପୋଷାକ ବିଷୟରେ ବିସ୍ତୃତ ସୂଚନା ମଧ୍ୟ ପ୍ରଦାନ କରାଯିବ। ଚଳଚ୍ଚିତ୍ର ନିର୍ମାତା ଯେଉଁମାନେ ଆମଠାରୁ ସାହାଯ୍ୟ ନେବେ କିମ୍ବା ଆମର ଧାର୍ମିକ ନିର୍ଦ୍ଦେଶାବଳୀ ଅନୁଯାୟୀ ଏକ ଚଳଚ୍ଚିତ୍ର ନିର୍ମାଣ କରିବେ, ତାଙ୍କୁ ଧାର୍ମିକ ସେନ୍ସର ବୋର୍ଡ ପକ୍ଷରୁ ଏକ ପ୍ରମାଣପତ୍ର ମଧ୍ୟ ପ୍ରଦାନ କରାଯିବ।