ଅତାବିରା: ବୁର୍ଲା ଥାନା ୫୩ନଂ ଜାତୀୟ ରାଜପଥ ଘୁଡୁକାଟିକ୍ରା ଠାରେ ପଶ୍ଚିମବଙ୍ଗକୁ ଗୋ-ଚାଲାଣ କରାଯାଉଥିବା ଏକ ଟ୍ରକରୁ ୨୩ଟି ଗୋରୁ ଉଦ୍ଧାର କରାଯାଇଛି। ସେଥିମଧ୍ୟରୁ ଗୋଟିଏ ଗୋରୁ ମୃତ ହୋଇଥିବା ସୂଚନା ମିଳିଛି। ଘଟଣାରୁ ପ୍ରକାଶ ଯେ, ଡିସେମ୍ବର 26 ତାରିଖ ଗୁରୁବାର ରାତି ୧୦ଟା ୩୦ରେ ଗୋଡଭଗା ତୁରୁମ ରାସ୍ତା ଦୁଲମପୁର ଛକରେ ଗୋଡଭଗା ବଜରଙ୍ଗ ଦଳର ସଦସ୍ୟମାନେ (ଡବ୍ଲ୍ୟୁବି ୩୩ସି ୩୦୯୬)ଟ୍ରକରେ ଗୋରୁ ଚାଲାଣ କରାଯାଉଥିବା ଦେଖିବାକୁ ପାଇଥିଲେ। ଏହାପରେ ସେମାନେ ଏହି ଟ୍ରକକୁ ପିଛାକରି ବୁର୍ଲା ଥାନା ଘୁଡୁକାଟିକ୍ରାଠାରେ ଅଟକାଇଥିଲେ। ଘଟଣାସ୍ଥଳରେ ଟ୍ରକ ଡ୍ରାଇଭର ଓ ଚାଲାଣ କରୁଥିବା ଅନ୍ୟ ଦୁଇଜଣ ବ୍ୟକ୍ତି ଫେରାର ହୋଇଯାଇଥିଲେ। ସୂଚନା ପାଇ ଗୋଶାଳା ଫାଣ୍ଡି ପୁଲିସ ଓ ଗୋଡଭଗା ବଜରଙ୍ଗ ଦଳର ସଦସ୍ୟମାନେ ଟ୍ରକରୁ ୨୨ଟି ଜୀବିତ ଗୋରୁ ଓ ଗୋଟିଏ ମୃତ ଗୋରୁକୁ ଉଦ୍ଧାର କରିଥିଲେ। ଏ ସମ୍ପର୍କରେ ପୁଲିସ ଏକ ମାମଲା ରୁଜୁକରି ଟ୍ରକକୁ ଅଟକରଖି ଘଟଣାର ତଦନ୍ତ କରୁଛି। ସମସ୍ତ ଉଦ୍ଧାର କରାଯାଇଥିବା ଗୋରୁଙ୍କୁ ଶ୍ରୀ କ୍ରିଷ୍ଣା ଗୋଶାଳାରେ ସୁରକ୍ଷିତ ଭାବେ ରଖାଯାଇଛି।