ନୂଆଦିଲ୍ଲୀ: ଜବାହରଲାଲ ନେହରୁ ଲେଡି ମାଉଣ୍ଟବ୍ୟାଟେନ୍, ଜୟପ୍ରକାଶ ନାରାୟଣଙ୍କ ସମେତ ଅନ୍ୟମାନଙ୍କୁ ଲେଖିଥିବା ଚିଠି ଫେରାଇ ଦେବାକୁ ପ୍ରଧାନମନ୍ତ୍ରୀଙ୍କ ସଂଗ୍ରହାଳୟ ଓ ପାଠାଗାର ସଦସ୍ୟ ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ଅନୁରୋଧ କରିଛନ୍ତି। ଏହି ଚିଠିଗୁଡ଼ିକୁ ସୋନିଆ ଗାନ୍ଧୀଙ୍କ ନିର୍ଦ୍ଦେଶରେ ୨୦୦୮ରେ ଫେରାଇ ନିଆଯାଇଥିଲା। ପିଏମ୍ଏମ୍ଏଲ୍ର ସଦସ୍ୟ ରିଜୱାନ କାଦ୍ରି କହିଛନ୍ତି, ସୋନିଆ ଗାନ୍ଧୀଙ୍କଠାରୁ କୌଣସି ପ୍ରତିକ୍ରିୟା ନ ମିଳିବା ପରେ ଲୋକସଭାରେ ବିରୋଧୀ ଦଳ ନେତାଙ୍କ ସହ ଯୋଗାଯୋଗ କରାଯାଉଛି। ଏହି ଦସ୍ତାବିଜଗୁଡ଼ିକ ଦେଶର ଐତିହ୍ୟର ଏକ ଅଂଶ ଏବଂ ଏହା ଇତିହାସର ଏକ ଗୁରୁତ୍ୱପୂର୍ଣ୍ଣ ଦିଗ ବୋଲି କାଦ୍ରି କହିଛନ୍ତି। ଯେପର୍ଯ୍ୟନ୍ତ ଆମେ ଏହି ସାମଗ୍ରୀଗୁଡ଼ିକୁ ଦେଖିପାରିବା ନାହିଁ, ଆମେ ସେଗୁଡ଼ିକର ପ୍ରତ୍ୟାହାରର କାରଣ ଜାଣିପାରିବୁ ନାହିଁ। ସେଗୁଡ଼ିକରୁ ନିଶ୍ଚୟ କିଛି ଆପତ୍ତିଜନକ ବିଷୟବସ୍ତୁ ହଟାଇ ଦିଆଯାଇଥିବ ବୋଲି ସେ କହିଛନ୍ତି।
ଜବାହରଲାଲ ନେହରୁ ଓ ଲେଡି ମାଉଣ୍ଟବ୍ୟାଟେନଙ୍କ ମଧ୍ୟରେ ଦିଆନିଆ ହୋଇଥିବା ଚିଠି ସହିତ ଗୋବିନ୍ଦ ବଲ୍ଲଭ ପନ୍ତ ଓ ଜୟପ୍ରକାଶ ନାରାୟଣଙ୍କ ସହ ଆଲୋଚନା ମଧ୍ୟ ଏହି ସଂକଳନରେ ରହିଛି ବୋଲି କାଦ୍ରି କହିଛନ୍ତି। ସେ କହିଛନ୍ତି ଯେ ଚଳିତ ବର୍ଷ ସେପ୍ଟେମ୍ବର ମାସରେ ପିଏମ୍ଏମ୍ଏଲ୍ (ପୂର୍ବରୁ ନେହରୁ ସ୍ମାରକୀ)ରେ ନେହରୁଙ୍କ ସମ୍ବନ୍ଧିତ ପ୍ରାୟ ୮ଟି ଭିନ୍ନ ଭିନ୍ନ ବିଭାଗର ୫୧ଟି କାର୍ଟୁନ୍ ସମ୍ପର୍କରେ ସୋନିଆ ଗାନ୍ଧୀଙ୍କୁ ଆନୁଷ୍ଠାନିକ ଅନୁରୋଧ କରାଯାଇଥିଲା। ତେବେ ଅନୁରୋଧର କୌଣସି ଉତ୍ତର ମିଳି ନ ଥିଲା। ଉକ୍ତ ୫୧ଟି କାର୍ଟୁନ୍ ଅନୁଷ୍ଠାନକୁ ଫେରାଇ ଦିଆଯାଉ, କିମ୍ବା ଆମକୁ ସେଗୁଡ଼ିକୁ ସ୍କାନ୍ କରିବାକୁ ଅନୁମତି ଦିଆଯାଉ କିମ୍ବା ସେଗୁଡ଼ିକର ସ୍କାନ୍ କପି ପ୍ରଦାନ କରାଯାଉ, ଯାହାଦ୍ବାରା ଆମେ ଏହାକୁ ଅଧ୍ୟୟନ କରିପାରିବା ଏବଂ ବିଭିନ୍ନ ପଣ୍ଡିତଙ୍କ ଦ୍ବାରା ଗବେଷଣା କରାଇପାରିବା ବୋଲି କାଦ୍ରି ଅନୁରୋଧପତ୍ରରେ ଉଲ୍ଲେଖ କରିଥିଲେ। ଭାରତୀୟ ଜନତା ପାର୍ଟି ନେତାମାନେ ତୁରନ୍ତ ଏହି ପ୍ରସଙ୍ଗକୁ ଗ୍ରହଣ କରି ସର୍ବସାଧାରଣ ସ୍ଥାନରୁ ଚିଠି ପ୍ରତ୍ୟାହାର ନେଇ ପ୍ରଶ୍ନ ଉଠାଇଛନ୍ତି।