ଉତ୍ତରପ୍ରଦେଶର ଚିତ୍ରକୂଟ ଜିଲ୍ଲା ସ୍ଥିତ ରାଏପୁରା ଗାଁରେ ଏବେ ଘରେ ଘରେ କେହି ନା କେହି ସରକାରୀ କର୍ମଚାରୀ କିମ୍ବା ଅଧିକାରୀ ଭାବେ ସ୍ଥାନ ପାଇଛନ୍ତି । ଗାଁର ୩୦ଜଣ ଯୁବ ଆଇପିଏସ୍, ଆଇଏଏସ୍, ପିସିଏସ୍ ଏବଂ ପିପିଏସ୍ ଅଫିସର୍ ଭାବେ ଗୌରବ ଅର୍ଜନ କରିଛନ୍ତି । ଏମାନଙ୍କ ସଫଳତା ପଛରେ କିନ୍ତୁ ଲୁଚି ରହିଛି ଏଭଳି ଜଣେ ଶିକ୍ଷକଙ୍କ ପରିଶ୍ରମର ଫଳ, ଯିଏକି ଶିକ୍ଷାର ସ୍ଥିତିକୁ ସୁଦୃଢ଼ କରିବାକୁ ପ୍ରାଣପଣେ ଉଦ୍ୟମ ଜାରି ରଖିଛନ୍ତି । ସେ ହେଲେ ଡ. ମହେନ୍ଦ୍ର ପ୍ରସାଦ ସିଂହ । ତାଙ୍କର ପ୍ରେରଣା ଏବଂ ପ୍ରୟାସ ଯୋଗୁ ଆଜି ଗାଁ ଯୁବପିଢ଼ିଏହି ସଫଳତାର ସୋପାନ ଛୁଇଁପାରିଛନ୍ତି । ଡ. ସିଂହ ପ୍ରଥମେ ସରକାରୀ ଇଣ୍ଟର୍ କଲେଜ୍ ଜଲାଉନ୍ରେ ପ୍ରଧାନଆଚାର୍ଯ୍ୟ ଥିଲେ । ଏହାସହ ଇତିହାସ ବିଷୟ ଉପରେ ତାଙ୍କର ପ୍ରବଳ ଦକ୍ଷତା ଥିଲା । ଚାକିରିରୁ ବଳକା ସମୟ ପାଇଲେ ସେ ପିଲାଙ୍କ ଭବିଷ୍ୟତ ସଜାଡ଼ିବାରେ ଲାଗିଯାନ୍ତି । କିନ୍ତୁ ଅବସର ନେବା ପରେ ସେ ଗାଁର ଶିକ୍ଷାବ୍ୟବସ୍ଥା ସମ୍ପୂର୍ଣ୍ଣ ରୂପେ ପରିବର୍ତ୍ତନ କରିଦେଲେ । ନିଜ ଉଦ୍ୟମରେ ଏକ ଟ୍ରଷ୍ଟ୍ ତିଆରି କରି ପିଲାଙ୍କୁ ସେଠାରେ ପଢ଼ାଇଲେ । ଏଠାରେ ପ୍ରତିବର୍ଷ ଦଶହରା ଉତ୍ସବରେ ମେଧା ସମ୍ମାନ ସମାରୋହର ଆୟୋଜନ
ହେଲା । ଏଥିରେ ଡ.ସିଂହଙ୍କ ଟ୍ରଷ୍ଟ୍ରେ ପାଠ ପଢ଼ୁଥିବା ପିଲାମାନେ ଯେକୌଣସି ପ୍ରକାରେ ପ୍ରଥମ, ଦ୍ୱିତୀୟ ଏବଂ ତୃତୀୟ ସ୍ଥାନ ହାସଲ କରିବାରେ ସମର୍ଥ ଥିଲେ । ଏହା ପିଲାଙ୍କୁ ପାଠପଢ଼ା ଦିଗରେ ବେଶ୍ ପ୍ରୋତ୍ସାହିତ କଲା । ଏହାଛଡ଼ା ପଢ଼ା କ୍ଷେତ୍ରରେ ପିଲାଙ୍କର କୌଣସି ଆର୍ଥିକ ସମସ୍ୟା ସୃଷ୍ଟି ହେଲେ, ତା’ର ସମାଧାନ ଦାୟିତ୍ୱ ମଧ୍ୟ ସେ ନିଜ ହାତକୁ ନେଇଥିଲେ । ଏହି ନିଷ୍ଠା ଏବଂ ଉଦ୍ୟମ ବଳରେ ଆଜି ଗାଁର ପ୍ରତିଟି ଘରୁ କେହି ନା କେହି ସରକାରୀ ଚାକିରିଆ ଭାବେ ଜଣା ।