ସମୟ ସହିତ ନିତ୍ୟ ନୂତନ ପ୍ରଯୁକ୍ତିବିଦ୍ୟାକୁ ଆପଣେଇ ଆଗକୁ ବଢ଼ିବା ଆବଶ୍ୟକ – ଗୋବିନ୍ଦ ମହନ୍ତ
ବିଦ୍ୟା ଭାରତୀର ଅଖିଳ ଭାରତୀୟ ପ୍ରଚାର ବିଭାଗ ଏବଂ ଅଭିଲେଖାଗାର ବୈଠକ
ନୋଏଡା: ବିଦ୍ୟା ଭାରତୀ ଅଖିଳ ଭାରତୀୟ ଶିକ୍ଷା ସଂସ୍ଥାନର ଅଖିଳ ଭାରତୀୟ ପ୍ରଚାର ବିଭାଗ ଏବଂ ଅଭିଲେଖାଗାରର ଦୁଇ ଦିନିଆ ବୈଠକ ନୋଏଡାସ୍ଥିତ ଭାଉରାଓ ଦେଓରସ ସରସ୍ୱତୀ ବିଦ୍ୟା ମନ୍ଦିରରେ ଅନୁଷ୍ଠିତ ହୋଇ ଯାଇଛି। ବୈଠକର ଉଦ୍ଘାଟନୀ ସତ୍ରରେ ଅଖିଳ ଭାରତୀୟ ସଂଗଠନ ମନ୍ତ୍ରୀ ଗୋବିନ୍ଦ ଜୀ ମହନ୍ତ, ଦକ୍ଷିଣ ମଧ୍ୟକ୍ଷେତ୍ର ସଂଗଠନ ମନ୍ତ୍ରୀ ଏବଂ ପ୍ରଚାର ବିଭାଗ ପ୍ରଭାରୀ ସୁଧାକର ଜୀ ରେଡ୍ଡୀ, ଅଖିଳ ଭାରତୀୟ କାର୍ଯ୍ୟକାରିଣୀ ସଦସ୍ୟ ଲଳିତ ବିହାରୀ ଗୋସ୍ୱାମୀ, ଅଖିଳ ଭାରତୀୟ ପ୍ରଚାର ବିଭାଗ ସଂଯୋଜକ ଡକ୍ଟର ରାମକୁମାର ଭାବସାର ଏବଂ ଅଖିଳ ଭାରତୀୟ ଅଭିଲେଖାଗାରର ସଂଯୋଜକ ରାଜେନ୍ଦ୍ର ଜୀ ବଘେଲ ଉପସ୍ଥିତ ଥିଲେ।
ଉଦ୍ଘାଟନୀ ସତ୍ରରେ ମୁଖ୍ୟ ବକ୍ତା ଗୋବିନ୍ଦ ମହନ୍ତ କହିଥିଲେ ଯେ ସମୟ ନିରନ୍ତର ପରିବର୍ତ୍ତନଶୀଳ। ବିଦ୍ୟା ଭାରତୀ ୧୯୫୨ରୁ ଶିକ୍ଷା ଓ ରାଷ୍ଟ୍ର ନିର୍ମାଣ କ୍ଷେତ୍ରରେ ନିରନ୍ତର କାର୍ଯ୍ୟରତ। ଆଜିର ସମୟରେ ଆଧୁନିକ ସଞ୍ଚାର ମାଧ୍ୟମ ଏବଂ ନିତ୍ୟ ନୂତନ ପ୍ରଯୁକ୍ତିବିଦ୍ୟାକୁ ଆପଣେଇ ସଂଗଠନର ବିଚାରକୁ ସମାଜର ବ୍ୟାପକ ବର୍ଗ ପର୍ଯ୍ୟନ୍ତ ପହଞ୍ଚାଇବା ଆମର ଦାୟିତ୍ୱ। ବିଦ୍ୟା ଭାରତୀର ଲକ୍ଷ୍ୟ କେବଳ ବିଦ୍ୟାଳୟ ପରିଚାଳନା କରିବା ନୁହେଁ, ବରଂ “ମାତୃ ଦେବୋ ଭବ, ପିତୃ ଦେବୋ ଭବ, ରାଷ୍ଟ୍ର ଦେବୋ ଭବ” ଭାବନାରେ ସମୃଦ୍ଧ ରାଷ୍ଟ୍ରଭକ୍ତ ନାଗରିକ ନିର୍ମାଣ କରିବା।
ସେ କହିଥିଲେ ଯେ ଆମର ଚିନ୍ତନ, ଇତିହାସ ଏବଂ ଯୋଗଦାନକାରୀଙ୍କ ଅଭିଲେଖଗୁଡ଼ିକର ବୈଜ୍ଞାନିକ ସଂରକ୍ଷଣ ଆବଶ୍ୟକ, ଯାହାଫଳରେ ଆଗାମୀ ପିଢ଼ି ନିଜର ଗୌରବମୟ ପରମ୍ପରା ସହିତ ଯୋଡ଼ି ହୋଇପାରିବେ। ଯାହା ସତ୍ୟ, ତାହାହିଁ ସ୍ଥାୟୀ ଓ ଚିରନ୍ତନ; ପ୍ରଚାର ବିଭାଗର ଦାୟିତ୍ୱ ଏହି ସତ୍ୟ ଏବଂ ସଫଳତାଗୁଡ଼ିକୁ ସମାଜ ସମ୍ମୁଖରେ ପ୍ରଭାବଶାଳୀ ଢଙ୍ଗରେ ଉପସ୍ଥାପନ କରିବ।
ଦେଶବ୍ୟାପୀ ‘ବନ୍ଦେ ମାତରମ୍ ଅଭିଯାନ’
ବୈଠକର ଆଭିମୁଖ୍ୟ ଉପସ୍ଥାପନ କରି ସୁଧାକର ଜୀ ରେଡ୍ଡୀ ଜଣାଇଥିଲେ ଯେ ସାରା ଦେଶରେ ବିଦ୍ୟା ଭାରତୀ ଦ୍ୱାରା ‘ବନ୍ଦେ ମାତରମ୍ ଅଭିଯାନ’ ଚଲାଯିବ। ‘ଅମୃତ ଉତ୍ସବ’କୁ ଦୃଷ୍ଟିରେ ରଖି ଏହି ଦୁଇ ଦିନିଆ ବୈଠକ ଆୟୋଜିତ ହୋଇଛି, ଯେଉଁଥିରେ ସଂଗଠନର କାର୍ଯ୍ୟକଳାପକୁ ଜନସାଧାରଣଙ୍କ ନିକଟରେ ପହଞ୍ଚାଇବା ପାଇଁ ରଣନୀତି ପ୍ରସ୍ତୁତ କରାଯାଉଛି।
ଏହି ଦୁଇ ଦିନିଆ ବୈଠକ ଅବସରରେ ପ୍ରଚାର ବିଭାଗ ଓ ଅଭିଲେଖାଗାରର କାର୍ଯ୍ୟର ସମୀକ୍ଷା, ଆଗାମୀ କାର୍ଯ୍ୟପନ୍ଥା, ପ୍ରଯୁକ୍ତିବିଦ୍ୟା ମାଧ୍ୟମର ପ୍ରଭାବଶାଳୀ ବ୍ୟବହାର ଏବଂ ବିଦ୍ୟା ଭାରତୀର କାର୍ଯ୍ୟଶୈଳୀକୁ ସମାଜରେ ପ୍ରସାରିତ କରିବା ବିଷୟରେ ଗହନ ମନ୍ଥନ କରାଯାଉଛି।