ସାରସକଣା ସରସ୍ୱତୀ ଶିଶୁ ବିଦ୍ୟାମନ୍ଦିରରେ ଜନ୍ମାଷ୍ଟମୀ ପାଳିତ
ବାରିପଦା : ପବିତ୍ର ଜନ୍ମାଷ୍ଟମୀ ଅବସରରେ ସରସ୍ୱତୀ ଶିଶୁ ବିଦ୍ୟାମନ୍ଦିର ସାରସକଣାରେ ଉତ୍ସାହ ଓ ଧାର୍ମିକ ଆଚାରରେ ଉତ୍ସବ ଅନୁଷ୍ଠିତ ହୋଇଥିଲା । ବିଦ୍ୟାଳୟ ପରିସରରେ ଆୟୋଜିତ ଏହି କାର୍ଯ୍ୟକ୍ରମରେ ବିଦ୍ୟାଳୟର ଭାରପ୍ରାପ୍ତ ପ୍ରଧାନ ଗୁରୁଜୀ ପ୍ରଶାନ୍ତ ସାହୁଙ୍କ ନେତୃତ୍ୱରେ ଏବଂ ଗୁରୁମା କାଜଲ ଦାସଙ୍କ ତତ୍ତ୍ୱାବଧାନରେ ଏହି ଉତ୍ସବ ଉପଲକ୍ଷେ ଛାତ୍ରଛାତ୍ରୀମାନେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମରେ ଭାଗ ନେଇଥିଲେ । ଉତ୍ସବର ମୁଖ୍ୟ ଆକର୍ଷଣ ଥିଲା ରାଧାକୃଷ୍ଣ ବେଶରେ ବିଦ୍ୟାଳୟର ଛାତ୍ରଛାତ୍ରୀଙ୍କ ଦ୍ୱାରା ଆୟୋଜିତ ଏକ ଆକର୍ଷଣୀୟ ପଦଯାତ୍ରା । ଏହି ପଦଯାତ୍ରା ବିଦ୍ୟାଳୟ ପରିସରରୁ ଆରମ୍ଭ କରି ସାରସକଣା ସାରସକ୍ଷେତ୍ର ପର୍ଯ୍ୟନ୍ତ ଯାଇଥିଲା । ପଦଯାତ୍ରାରେ ଭାଗ ନେଇଥିବା ଛାତ୍ରଛାତ୍ରୀମାନେ ନିଜେ କରିଥିବା ବେଶଭୂଷାରେ ସଭିଙ୍କୁ ଆକର୍ଷିତ କରିଥିଲେ । ପଦଯାତ୍ରା ପରବର୍ତ୍ତୀ ସାଧାରଣ ସଭାରେ ବିଦ୍ୟାଳୟର ଗୁରୁଜୀ ପ୍ରଶାନ୍ତ ସାହୁ ଓ ଗୁରୁମା କାଜଲ ଦାସ, ଜନ୍ମାଷ୍ଟମୀର ଧାର୍ମିକ ତାତ୍ପର୍ଯ୍ୟ ବିଷୟରେ ଭାଷଣ ଦେଇଥିଲେ । ସେମାନେ ଶ୍ରୀକୃଷ୍ଣଙ୍କ ଜୀବନ ଓ ଲୀଳାମୂର୍ତ୍ତି ଉପରେ ଆଲୋକପାତ କରି ସମାଜରେ ଧର୍ମରକ୍ଷାର ମହତ୍ତ୍ୱ ଉଲ୍ଲେଖ କରିଥିଲେ । ଏହି କାର୍ଯ୍ୟକ୍ରମରେ ଗଣ ବେଶ ପ୍ରତିଯୋଗିତା ଆୟୋଜିତ ହୋଇଥିଲା, ଯେଉଁଥିରେ ଛାତ୍ରଛାତ୍ରୀମାନେ ସଫଳତା ଅର୍ଜନ କରିଥିଲେ । କୃଷ୍ଣ ଭୂମିକାରେ ସାୟାନ ପ୍ରତିହାରୀ ଏବଂ ଶ୍ରେୟାନସି ସାହୁ ପ୍ରଥମ ସ୍ଥାନ ଅର୍ଜନ କରିଥିଲେ, ଯେଉଁଥିରେ ଅନ୍ୟ ଛାତ୍ରଛାତ୍ରୀମାନେ ମଧ୍ୟ ପୁରସ୍କୃତ ହୋଇଥିଲେ । ପରିଶେଷରେ ବିଦ୍ୟାମନ୍ଦିରର ଆଚାର୍ଯ୍ୟ, ଗୁରୁଜୀ ଅଭିନନ୍ଦନ ସାହୁ ସମସ୍ତଙ୍କୁ ଧନ୍ୟବାଦ ଜଣାଇ କାର୍ଯ୍ୟକ୍ରମର ସମାପନ ଘୋଷଣା କରିଥିଲେ ।