ଯୁବତୀଙ୍କ ଭିଡିଓ ରେକର୍ଡିଂ କରି ବ୍ଲାକ୍ମେଲିଂ
ଭୁବନେଶ୍ୱର, ୨୮/୧୦ : ରାଜଧାନୀରେ ଏକ ଲଭ୍ ଜିହାଦ୍ ଭଳି ଘଟଣା ପଦାକୁ ଆସିଛି। ନିଜକୁ ହିନ୍ଦୁ ବୋଲି କହି ଯୁବତୀଙ୍କୁ ପ୍ରେମ ଜାଲରେ ଫସାଇଲେ। ବିବାହର ପ୍ରତିଶ୍ରୁତି ଦେଇ ଶାରୀରିକ ସମ୍ପର୍କ ରଖି ଅଶ୍ଳୀଳ ଭିଡିଓ ରେକର୍ଡ କଲେ। ପରେ ବ୍ଲାକ୍ ମେଲିଂ କରି ଟଙ୍କା ମାଗିଲେ। ପ୍ରତିବାଦ କରିବାରୁ ମାଡ଼ମାରିବା ସହ ବେକ ଚିପି ହତ୍ୟା ଉଦ୍ୟମ କଲେ। ଯୁବତୀଙ୍କ ଅଭିଯୋଗ ପରେ ଏହି ନେଇ ମହିଳା ଥାନା ପୁଲିସ କେନ୍ଦ୍ରାପଡ଼ାର ସେକ୍ ଇରଫାନ୍ ନାମକ ଜଣେ ଯୁବକଙ୍କୁ ଗିରଫ କରି ଆଜି କୋର୍ଟ ଚାଲାଣ କରିଛି।
ମୁଖ୍ୟ ପଏଣ୍ଟସ:
- କେନ୍ଦ୍ରାପଡ଼ାରୁ ଯୁବକଙ୍କୁ ଗିରଫ କଲା ପୁଲିସ
- ମୋବାଇଲ୍ରୁ ମିଳିଲା ଏକାଧିକ ଯୁବତୀଙ୍କ ଅଶ୍ଳୀଳ ଭିଡିଓ
- ଜିହାଦୀ ସଂଗଠନ ସହ ସମ୍ପର୍କ ନେଇ ଖୋଳତାଡ଼
ଘଟଣାର ବିସ୍ତୃତ ବିବରଣୀ:
- ପରିଚୟ ଓ ପ୍ରେମ ଜାଲ:୨୦ ବର୍ଷ ବୟସର ଏହି ଯୁବତୀ ଜଣକ ଭୁବନେଶ୍ୱରରେ ରହି ଏକ ଘରୋଇ ସଂସ୍ଥାରେ ଚାକିରି କରୁଛନ୍ତି। ୨୦୨୪ ମାର୍ଚ୍ଚରେ ସୋସିଆଲ ମିଡିଆ ଇନ୍ଷ୍ଟାଗ୍ରାମ୍ରେ ଅଭିଯୁକ୍ତ ଇରଫାନ୍ ସହ ଯୁବତୀଙ୍କର ପରିଚୟ ହୋଇଥିଲା। ସେତେବେଳେ ଇରଫାନ୍ ନିଜ ଇନ୍ଷ୍ଟାଗ୍ରାମ୍ ଆଇଡିରେ ନିଜକୁ ‘କୁମାର ପିଣ୍ଟୁ’ ବୋଲି ଦର୍ଶାଇଥିଲା। ଏମିତି ଧର୍ମ ଲୁଚାଇ ନିଜକୁ ହିନ୍ଦୁ ବୋଲି ପରିଚୟ ଦେଇ ଯୁବତୀଙ୍କ ସହ ସମ୍ପର୍କ ବଢ଼ାଇଥିଲା।
- ଲିଭ୍-ଇନ୍ ରହଣି ଓ ପ୍ରତାରଣା:ଦେଢ଼ରୁ ଦୁଇ ମାସ ମଧ୍ୟରେ ଅଭିଯୁକ୍ତ ଇରଫାନ୍ ଯୁବତୀଙ୍କୁ ବିବାହ କରିବାକୁ ପ୍ରତିଶ୍ରୁତି ଦେବା ସହ ଏକାଠି ରହିବାକୁ କହିଥିଲା। ଯୁବତୀ ଜଣକ ରାଜି ହୋଇଯାଇଥିଲେ। ସେମାନେ ଶ୍ରୀଲିଙ୍ଗରାଜ ଥାନା ଅଧୀନ ଗ୍ୟାରେଜ୍ ଛକ ନିକଟରେ ଏକ ଘର ଭଡ଼ା ନେଇ ରହୁଥିଲେ।
- ସତ ପଦାକୁ ଆସିବା ଓ ନିର୍ଯାତନା:କିଛି ଦିନ ତଳେ ଯୁବତୀ ଜଣକ ଜାଣିବାକୁ ପାଇଥିଲେ ଯେ କୁମାର ପିଣ୍ଟୁ ନାମକ ଏହି ଯୁବକ ହିନ୍ଦୁ ନୁହନ୍ତି, ତାଙ୍କ ପ୍ରକୃତ ନାମ ସେକ୍ ଇରଫାନ୍। ଏପରିକି ଇରଫାନ୍ ଏକାଧିକ ଯୁବତୀ ଓ ନାବାଳିକାଙ୍କୁ ପ୍ରେମ ଜାଲରେ ଫସାଇ ସେମାନଙ୍କ ସହ ଶାରୀରିକ ସମ୍ପର୍କ ରଖିଛନ୍ତି ଏବଂ ସେମାନଙ୍କ ଅନ୍ତରଙ୍ଗ ସମୟର ଫଟୋ ଓ ଭିଡିଓ ରଖିଛନ୍ତି। ଯୁବତୀ ଜଣକ ଏ ବିଷୟରେ ଇରଫାନ୍ଙ୍କୁ ପଚାରିଥିଲେ। ଏହାକୁ ନେଇ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଏହା ପରେ ଇରଫାନ୍ ଯୁବତୀଙ୍କୁ ଶାରୀରିକ ଓ ମାନସିକ ନିର୍ଯାତନା ଦେବା ଆରମ୍ଭ କରିଦେଇଥିଲେ।
- ବ୍ଲାକ୍ମେଲିଂ ଓ ଆକ୍ରମଣ:ଏସବୁ ଦେଖି ଯୁବତୀ ଜଣକ କିଛି ଉପାୟ ନପାଇ ଲୋକ ଲଜ୍ଜା ପାଇଁ ଇରଫାନ୍ଙ୍କଠାରୁ ସମ୍ପର୍କ ଛିନ୍ନ କରି ଦୂରେଇ ଯାଇଥିଲେ। ତେବେ ଇରଫାନ୍ ତାଙ୍କୁ ବାରମ୍ବାର ଯୋଗାଯୋଗ କରି ଅଶ୍ଳୀଳ ଫଟୋ ଓ ଭିଡିଓ ପଠାଇ ବ୍ଲାକ୍ମେଲିଂ କରିବା ଆରମ୍ଭ କରି ଟଙ୍କା ମାଗିଥିଲେ। ଯୁବତୀ କିଛି ଶୁଣି ନଥିଲେ।ଗତ ୨୪ ତାରିଖ ଅପରାହ୍ନ ପ୍ରାୟ ୩ଟା ବେଳେ ଯୁବତୀ ଜଣକ ଡ୍ୟୁଟିକୁ ଯିବା ବେଳେ ଅଭିଯୁକ୍ତ ତାଙ୍କୁ ବାଟରେ ଅଟକାଇ ଏକ କାଠ ଫାଳିଆରେ ମାରାତ୍ମକ ଆକ୍ରମଣ କରିବା ସହ ବେକ ଚିପି ହତ୍ୟା କରିବାକୁ ଉଦ୍ୟମ କରିଥିଲା। ଯୁବତୀ ଜଣକ ତଳେ ପଡ଼ିଯିବାରୁ ଇରଫାନ୍ ତାଙ୍କ ସୁନା ଚେନ୍ ଏବଂ ଟଙ୍କା ଛଡ଼ାଇ ନେଇ ପଳାଇଥିଲା। ଏପରିକି ଥାନାରେ ଅଭିଯୋଗ କଲେ ଜୀବନରୁ ମାରିଦେବାକୁ ଧମକ ଦେଇଥିଲା।
- ପୁଲିସ୍ କାର୍ଯ୍ୟାନୁଷ୍ଠାନ ଓ ତଦନ୍ତ:ଯୁବତୀ ଜଣକ ଏନେଇ ମହିଳା ଥାନାରେ ଏତଲା ଦେଇଥିଲେ। ପୁଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ଅଭିଯୁକ୍ତକୁ କେନ୍ଦ୍ରାପଡ଼ା ତିନିମୁହାଣୀ ବସ୍ ଷ୍ଟାଣ୍ଡରୁ ଗିରଫ କରିଥିଲା ପୁଲିସ।ଫୋନ୍ ଯାଞ୍ଚ କରିବା ବେଳେ ଇରଫାନ୍ ଏକାଧିକ ହିନ୍ଦୁ ଯୁବତୀଙ୍କୁ ପ୍ରେମ ଜାଲରେ ଫସାଇ ବିବାହର ପ୍ରତିଶ୍ରୁତି ଦେଇ ବିଭିନ୍ନ ହୋଟେଲ୍କୁ ନେଇ ଶାରୀରିକ ସମ୍ପର୍କ ରଖି ଅଶ୍ଳୀଳ ଭିଡିଓ ରେକର୍ଡିଂ କରିଛି। ଏମିତି ଉକ୍ତ ଫଟୋ ଓ ଭିଡିଓକୁ ଅଭିଯୁକ୍ତ ତାର ବିଭିନ୍ନ ସହଯୋଗୀଙ୍କୁ ପଠାଇଥିବା ପୁଲିସ ଜାଣିବାକୁ ପାଇଛି। ଇରଫାନ୍ର ଏହି ଲଭ୍ ଜିହାଦ୍ ପଛରେ କାହାର ହାତ ରହିଛି ଏବଂ ତା’ର କୌଣସି ଜିହାଦୀ ସଂଗଠନ ସହ ସମ୍ପର୍କ ରହିଛି କି ନାହିଁ ସେ ଦିଗରେ ପୁଲିସ ତଦନ୍ତ କରୁଥିବା ଜଣାପଡ଼ିଛି।