ଇସ୍ଲାମାବାଦ୍: ପାକିସ୍ତାନ ଅଧିକୃତ ଗିଲଗିଟ-ବାଲୁଚିସ୍ତାନରେ ସ୍ୱାଧୀନତା ପାଇଁ ବିରୋଧ ପ୍ରଦର୍ଶନ ବେଳେ ପାକିସ୍ତାନୀ ସେନା ବିକ୍ଷୋଭକାରୀଙ୍କ ଉପରକୁ ଗୁଳି ଚଳାଇବାରୁ ଅନେକ ବିକ୍ଷୋଭକାରୀଙ୍କ ମୃତ୍ୟୁ ଘଟିଛି । ଗତ କିଛି ବର୍ଷ ଧରି ବାଲୁଚିସ୍ତାନର ଲୋକମାନେ ସ୍ୱାଧୀନତା ପାଇଁ ବିକ୍ଷୋଭ ପ୍ରଦର୍ଶନ କରିଆସୁଛନ୍ତି । ଗତ କିଛି ଦିନ ହେବ ଗିଲଗିଟବାଲୁଚିସ୍ତାନର ଲୋକମାନେ ପାକିସ୍ତାନ ସରକାରଙ୍କ ବିରୋଧରେ ଏକ ମୋର୍ଚ୍ଚା ଚଳାଇଛନ୍ତି । ପାକିସ୍ତାନ ଏବଂ ଏହାର ସେନା ବିରୋଧରେ ଲଗାତାର ପ୍ରଦର୍ଶନ ମଧ୍ୟ କରାଯାଉଛି । ପାକିସ୍ତାନ ସରକାରଙ୍କ ବିରୋଧରେ ବିରୋଧ ଦିନକୁ ଦିନ ଉଗ୍ରରୂପ ଧାରଣ କରୁଛି । ପାକିସ୍ତାନୀ ସେନା ଏବଂ ଗିଲଗିଟବାଲୁଚିସ୍ତାନର ଲୋକଙ୍କ ମଧ୍ୟରେ ବିତର୍କର ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ସେଠାରେ ବହୁ ସଂଖ୍ୟକ ଲୋକ ପାକ୍ ସେନା ବିରୋଧରେ ଠିଆ ହୋଇଛନ୍ତି ଏବଂ ପାକିସ୍ତାନୀ ସେନା ବିରୋଧରେ ଲଗାତାର ସ୍ଲୋଗାନ ଦେଉଛନ୍ତି । ତେବେ ପାକିସ୍ତାନ ସର୍ବଦା ଆନ୍ତର୍ଜାତୀୟ ସ୍ତରରେ ଭାରତ ଉପରେ ଅଭିଯୋଗ କରିଆସୁଛି ଯେ ଜାମ୍ମୁ କାଶ୍ମୀରବାସୀଙ୍କୁ ଭାରତୀୟ ସେନା ଅତ୍ୟାଚାର କରୁଛି, କିନ୍ତୁ ଗିଲଗିଟବାଲୁଚିସ୍ତାନର ଲୋକମାନେ ପାକ୍ ସେନା ବିରୋଧରେ ଯେପରି ବିରୋଧ କରୁଛନ୍ତି, ଏହା ପୁଣି ଥରେ ପାକିସ୍ତାନକୁ ସତର୍କ କରିଛି । ନିକଟରେ ଏକ ଭାଇରାଲ ଭିଡିଓରେ ମଧ୍ୟ ଏହା ଦେଖିବାକୁ ମିଳିଛି ଯେ ଯେତେବେଳେ ଲୋକମାନେ ପାକ୍ ସେନା ବିରୋଧରେ ବିରୋଧ କରୁଛନ୍ତି ସେତେବେଳେ ସେନା ଅଧିକାରୀମାନେ ଚୁପ୍ ରହୁଛନ୍ତି ।ପାକିସ୍ତାନ ଅଧିକୃତ ଗିଲଗିଟବାଲୁଚିସ୍ତାନ ଲୋକମାନେ କହିଛନ୍ତି ଯେ ପାକିସ୍ତାନୀ ସେନା ସେଠାରେ ଥିବା ଜମିକୁ ଜବରଦଖଲ କରି ନେଇଛି । ଏହି କାରଣରୁ ସେଠାରେ ରହୁଥିବା ଲୋକମାନେ ଭେଦଭାବର ସମ୍ମୁଖୀନ ହେଉଛନ୍ତି ଏବଂ ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ଯିବାକୁ ବାଧ୍ୟ ହେଉଛନ୍ତି । ନିକଟରେ ବାଲୁଚିସ୍ତାନର ଲିବରେସନ୍ ଆର୍ମି (ବିଏଲ୍ଏ) ବାଲୁଚିସ୍ତାନରେ ପାକିସ୍ତାନୀ ସେନା ଗାଡି ଉପରେ ଆକ୍ରମଣ କରି ଜଣେ ସେନା ଅଧିକାରୀ ଏବଂ ୫ ଜଣ ସୈନିକଙ୍କୁ ହତ୍ୟା କରିଛନ୍ତି ।