ଶ୍ରୀହରିକୋଟା: ଆଜି ଇତିହାସ ସୃଷ୍ଟି
କରିବାକୁ ଯାଉଛି ଭାରତୀୟ ମହାକାଶ ଗବେଷଣା
ସଂସ୍ଥା (ଇସ୍ରୋ) । ଇସ୍ରୋ ପକ୍ଷରୁ ଚନ୍ଦ୍ରଯାନ-୩
ଉତକ୍ଷେପଣ ପାଇଁ ସବୁ ପ୍ରସ୍ତୁତି ଶେଷ ହୋଇଛି ଓ ଏହାର
କାଉଣ୍ଟଡାଉନ ଆରମ୍ଭ ହୋଇଯାଇଛି । ଶୁକ୍ରବାର
ଅପରାହ୍ନ ୨ଟା ୩୫ମିନିଟରେ ଆନ୍ଧ୍ରପ୍ରଦେଶର
ଶ୍ରୀହରିକୋଟାରୁ ଏହି ଅଭିଯାନ ଆରମ୍ଭ କରାଯିବାର
କାର୍ଯ୍ୟକ୍ରମ ରହିଛି । ଚନ୍ଦ୍ରଯାନ-୩ ମିଶନର ଉତକ୍ଷେପଣ
ପ୍ରକ୍ରିୟାର ୨୪ ଘଣ୍ଟିଆ ଉତକ୍ଷେପଣ ଅଭ୍ୟାସ ବୁଧବାର
ଶେଷ ହୋଇଛି । ବରିଷ୍ଠ ମହାକାଶ ବୈଜ୍ଞାନିକ ଜି.
ମାଧବନ ନାୟାର କହିଛନ୍ତି ଯେ ଚନ୍ଦ୍ରରେ ଚନ୍ଦ୍ରଯାନ-
୩ ଅଭିଯାନ ସବୁ କ୍ଷେତ୍ରରୁ ସଫଳ ହେବା ଦରକାର
ଯାହା ଦ୍ୱାରା ଭାରତ ମହାକାଶ ଗବେଷଣାକ୍ଷେତ୍ରରେ ଏକ
ମାଇଲଖୁଣ୍ଟ ଅତିକ୍ରମ କରିପାରିବ । ଚନ୍ଦ୍ର ପୃଷ୍ଠରେ ସଫ୍ଟ
ଲ୍ୟାଣ୍ଡିଂ (ନିୟନ୍ତ୍ରିତ ଅବତରଣ) ଅତ୍ୟନ୍ତ କଷ୍ଟକର ଓ
ଜଟିଳ ବୋଲି ସେ ବର୍ଣ୍ଣନା କରିଛନ୍ତି । ୪ ବର୍ଷ ତଳେ
୨୦୧୯ରେ ଚନ୍ଦ୍ରଯାନ-୨ ଅଭିଯାନ ସମୟରେ
ଲ୍ୟାଣ୍ଡର ସଫ୍ଟ ଲ୍ୟାଣ୍ଡିଂ କରିବାରେ ସଫଳ
ହୋଇପାରିନଥିଲା । ଏହାକୁ ଦୃଷ୍ଟିରେ ରଖି
ଚନ୍ଦ୍ରଯାନ-୩ ମିଶନ କୁ ଭାରତ ପାଇଁ ଅତ୍ୟନ୍ତ
ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି ।
ମାଧବନ ନାୟାର କହିଛନ୍ତି ଯେ ଜାତୀୟ ମହାକାଶ
ଏଜେନ୍ସି ପ୍ରାୟ ୪ ବର୍ଷ ପୂର୍ବେ ଚନ୍ଦ୍ରଯାନ-୨ର ସଫ୍ଟ ଲ୍ୟାଣ୍ଡିଂ
ସମୟରେ ସମସ୍ୟାର ସମାଧାନ ପାଇଁ ଅନେକ ପଦକ୍ଷେପ
ନେଇଥିଲା ଏବଂ ନିଜର ବ୍ୟବସ୍ଥାକୁ ସୁଦୃଢ଼ କରିଥିଲା ।