ଶ୍ରୀନଗର, ୧୬ା୬: ଗତ ରାତିରେ ଜମ୍ମୁ ଓ
କଶ୍ମୀରର କୁପ୍ୱାରା ଜିଲ୍ଲାରେ ଆରମ୍ଭ ହୋଇଥିବା
ଏନ୍କାଉଣ୍ଟରରେ ୫ଜଣ ବିଦେଶୀ ଆତଙ୍କବାଦୀ
ନିହତ ହୋଇଥିବା କଥା କଶ୍ମୀର ଜୋନ୍ ପୁଲିସ
କହିଛି । ସେନା ଓ ପୁଲିସର ମିଳିତ ଟିମ୍ ଏବଂ
ଆତଙ୍କବାଦୀଙ୍କ ମଧ୍ୟରେ ଏହି ଗୁଳିବିନିମୟ
ହୋଇଥିଲା । ଏବେ ମଧ୍ୟ ସେ ଅଞ୍ଚଳରେ ତଲାସ
ଅଭିଯାନ ଚାଲୁ ରହିଛି ବୋଲି ସରକାରୀ
ଅଧିକାରୀମାନେ କହିଛନ୍ତି । ଗଣମାଧ୍ୟମକୁ କଶ୍ମୀର
‘ଏଡିଜିପି’ ବିଜୟ କୁମାର କହିଛନ୍ତି,
ଏନ୍କାଉଣ୍ଟରରେ ୫ଜଣ ଆତଙ୍କବାଦୀ ନିହତ
ହୋଇଛନ୍ତି । ତଲାସ ଅଭିଯାନ ଜାରି ରହିଛି ।
ନିୟନ୍ତ୍ରଣ ରେଖା ନିକଟ ଜୁମାଗୁଣ୍ଡ ଅଞ୍ଚଳରେ
ଆତଙ୍କବାଦୀଙ୍କ ଉପସ୍ଥିତି ବିଷୟରେ ସୁନିର୍ଦ୍ଦିଷ୍ଟ
ସୂଚନା ପାଇବା ପରେ ନିରାପତ୍ତା ବଳ ତଲାସ
ଅଭିଯାନ ଆରମ୍ଭ କରିଥିଲା । ସୂଚନାଯୋଗ୍ୟ,
ଆଜିର ଏନ୍କାଉଣ୍ଟର ହେଉଛି ଅଳ୍ପ ଦିନ ହେବ
ନିରାପତ୍ତା ବଳ ଭଣ୍ଡୁର କରୁଥିବା ଅନୁପ୍ରବେଶ
ଉଦ୍ୟମଗୁଡ଼ିକ ମଧ୍ୟରୁ ଗୋଟିଏ ଘଟଣା ।
ଗତକାଲି ମଧ୍ୟ ସେନା ପୁଞ୍ଚ୍ ସେକ୍ଟର ନିକଟରେ
ଅନୁପ୍ରବେଶ ଉଦ୍ୟମ ବିଫଳ କରାଇବା ସହିତ
ଘଟଣାସ୍ଥଳରୁ ବିପୁଳ ପରିମାଣର ଅସ୍ତ୍ରଶସ୍ତ୍ର ଉଦ୍ଧାର
କରିଥିଲେ । ସରକାରୀ ଅଧିକାରୀମାନଙ୍କ କହିବା
ଅନୁସାରେ, ଫେବ୍ରୁଆରି ମାସରୁ ଏଯାବତ୍
ନିୟନ୍ତ୍ରଣ ରେଖା ଅଞ୍ଚଳରେ ୧୦ଟି ପ୍ରମୁଖ
ଅନୁପ୍ରବେଶ ଉଦ୍ୟମ ବ୍ୟର୍ଥ କରାଯାଇଛି । ଜମ୍ମୁ
ଓ କଶ୍ମୀରକୁ ଆତଙ୍କବାଦୀ ପଠାଇବାକୁ ପାକିସ୍ତାନ
କିଭଳି ବ୍ୟାକୁଳ ତାହା ଏଥିରୁ ଜଣାପଡୁଛି ।