ନୂଆଦିଲ୍ଲୀ: ପିଲାମାନେ ଏବେ ନବମ ଶ୍ରେଣୀରୁ ଭାରତୀୟ ଗଣତନ୍ତ୍ରର ଏକ କଳା ଅଧ୍ୟାୟ ଜରୁରୀକାଳୀନ ପରିସ୍ଥିତି ବିଷୟରେ ପଢ଼ିବେ।୯ମ ଶ୍ରେଣୀରୁ ଜରୁରୀକାଳୀନ ପରିସ୍ଥିତି ବିଷୟରେ ଜାଣିବେ। ନବମ ଶ୍ରେଣୀ ପାଇଁ ପ୍ରକାଶିତ ନୂତନ ସାମାଜିକ ବିଜ୍ଞାନ ପାଠ୍ୟପୁସ୍ତକରେ ଜାତୀୟ ଶିକ୍ଷା ଗବେଷଣା ଏବଂ ତାଲିମ ପରିଷଦ (ଏନସିଇଆରଟି) ଜରୁରୀକାଳୀନ ପରିସ୍ଥିତିକୁ ଗୁରୁତ୍ୱ ଦେଇଛି। ଏନସିଇଆରଟି ଏହାର ନୂତନ ସାମାଜିକ ବିଜ୍ଞାନ ପାଠ୍ୟପୁସ୍ତକ ‘ଅଣ୍ଡରଷ୍ଟାଣ୍ଡିଂ ସୋସାଇଟି: ଇଣ୍ଡିଆ ଆଣ୍ଡ୍ ବିୟଣ୍ଡ୍’ରେ ଗଣତନ୍ତ୍ର ସାମ୍ନା କରୁଥିବା ଆହ୍ବାନ ସମ୍ପର୍କରେ ଅଧ୍ୟାୟର ପୃଷ୍ଠା ସଂଖ୍ୟା ୧୫୫ରେ ଜରୁରୀକାଳୀନ ପରିସ୍ଥିତିକୁ ସ୍ଥାନ ଦିଆଯାଇଛି। ଏଥିରେ ଏହା କେବେ ଲାଗୁ କରାଯାଇଥିଲା ଏବଂ ଏହା କେତେ ଦିନ ପାଇଁ କାର୍ଯ୍ୟକାରୀ ହୋଇଥିଲା, ସାଧାରଣ ଲୋକଙ୍କ ମୌଳିକ ଅଧିକାର କିପରି ସଙ୍କୁଚିତ ହୋଇଥିଲା ଏବଂ ଏହି ସମୟ ମଧ୍ୟରେ ଜୟପ୍ରକାଶ ନାରାୟଣଙ୍କ ନେତୃତ୍ୱରେ ଚାଲିଥିବା ଆନ୍ଦୋଳନ ବିଷୟରେ ବିସ୍ତୃତ ଭାବରେ ବର୍ଣ୍ଣନା କରାଯାଇଛି।
ଏହି ପାଠ୍ୟପୁସ୍ତକଟି ଜାତୀୟ ଶିକ୍ଷା ନୀତି(ଏନଇପି) ଏବଂ ଜାତୀୟ ପାଠ୍ୟକ୍ରମ ଢାଞ୍ଚା ଅନୁସାରେ ପ୍ରସ୍ତୁତ କରାଯାଇଛି। ନୂତନ ପାଠ୍ୟପୁସ୍ତକଟି ଭାରତୀୟ ସଭ୍ୟତା ଏବଂ ସାଂସ୍କୃତିକ ଐତିହ୍ୟକୁ ଗୁରୁତ୍ୱ ଦିଆଯାଇଛି। ଅପରପକ୍ଷରେ ୟୁରୋପୀୟ-କୈନ୍ଦ୍ରିକ ବିଷୟବସ୍ତୁକୁ ସୀମିତ କରାଯାଇଛି। ସେହିପରି ଫରାସୀ ବିପ୍ଳବ, ୟୁରୋପରେ ସମାଜବାଦ ଏବଂ ରୁଷ ବିପ୍ଳବ, ନାଜିବାଦ ଏବଂ ହିଟଲରର ଉତ୍ଥାନ, ଉପନିବେଶବାଦ ଭଳି ଅଧ୍ୟାୟଗୁଡ଼ିକୁ ହଟାଇ ଦିଆଯାଇଛି। ନୂତନ ପାଠ୍ୟପୁସ୍ତକରେ ହରପ୍ପା, ମେସୋପୋଟାମିଆ, ମିଶର ଏବଂ ଚୀନ୍ର ପ୍ରାଚୀନ ସଭ୍ୟତା ଭଳି ବିଷୟଗୁଡ଼ିକ ଅନ୍ତର୍ଭୁକ୍ତ କରାଯାଇଛି। ପିଲା ଏସବୁ ପ୍ରାଚୀନ ସଭ୍ୟତାର କାଳକ୍ରମ ଏବଂ ଭୌଗୋଳିକ ପରିସର, ଏବଂ ସୁମେରୀୟ ସଭ୍ୟତାର ଜଳସେଚନ ବ୍ୟବସ୍ଥା, ନିର୍ମାଣ ଏବଂ ସାମାଜିକ ସଂଗଠନ ବିଷୟରେ ଶିକ୍ଷାଲାଭ କରିବେ। ଏହି ପାଠ୍ୟପୁସ୍ତକ ମାଧ୍ୟମରେ, ଛାତ୍ରଛାତ୍ରୀମାନେ କେବଳ ତଥ୍ୟ ପର୍ଯ୍ୟନ୍ତ ସୀମିତ ରହିବେ ନାହିଁ ବରଂ ସମାଜ, ଇତିହାସ, ଭୂଗୋଳ ଏବଂ ଗଣତନ୍ତ୍ରର ବ୍ୟବହାରିକ ଦିଗଗୁଡ଼ିକୁ ମଧ୍ୟ ବୁଝିପାରିବେ। ଦୈନିକ ଉଦାହରଣ ମାଧ୍ୟମରେ ଛାତ୍ରଛାତ୍ରୀମାନଙ୍କୁ ଭାରତୀୟ ଜ୍ଞାନ ପରମ୍ପରା ବୁଝାଇବାକୁ ଚେଷ୍ଟା କରାଯାଇଛି। ଏଥିରେ ପଞ୍ଚତତ୍ତ୍ୱ ପୃଥିବୀ, ଜଳ, ଅଗ୍ନି, ବାୟୁ ଏବଂ ଅନ୍ତରୀକ୍ଷର ଧାରଣା ମାଧ୍ୟମରେ ପରସ୍ପର ସହିତ ଜଡିତ ପ୍ରକୃତି ଏବଂ ମାନବ ଜୀବନକୁ ବୁଝାଯାଇଛି। ଏଥିରେ ଭୂସ୍ଖଳନ ନାମକ ଏକ ପାଠ ମଧ୍ୟ ଅନ୍ତର୍ଭୁକ୍ତ, ଯେଉଁଥିରେ ଛାତ୍ରଛାତ୍ରୀମାନେ ପଥର, କାଦୁଅ ଏବଂ ଭଗ୍ନାବଶେଷ ଖସିବା ବିଷୟରେ ଜାଣିବେ। ଏହା ସେମାନଙ୍କୁ ସେମାନଙ୍କ ଚାରିପାଖରେ ଏପରି ପରିସ୍ଥିତିକୁ କିପରି ଏଡାଇହେବ ସେ ବିଷୟରେ ସୂଚନା ପ୍ରଦାନ କରାଯାଇଛି।