ପଞ୍ଚ ପରିବର୍ତ୍ତନ ଦ୍ୱାରା ହିଁ ହିନ୍ଦୁ ସମାଜ ସୁଦୃଢ଼ ହେବ: ଗୋପାଳ
ହିନ୍ଦୁ ସମାଜକୁ ସଂଗଠିତ କରିବା ଏବଂ ରାଷ୍ଟ୍ରୀୟ ଏକତାକୁ ସୁଦୃଢ଼ କରିବା ପାଇଁ ଜୀବନ ସହିତ ଜଡିତ ପାଞ୍ଚଟି ଛୋଟ କିନ୍ତୁ ପ୍ରଭାବଶାଳୀ ପରିବର୍ତ୍ତନ ଆବଶ୍ୟକ। ଏଥିରେ ସ୍ବବୋଧ, ପରିବେଶ ସୁରକ୍ଷା, ସାମାଜିକ ସମରସତା, କୁଟୁମ୍ଭ ପ୍ରବୋଧନ ଏବଂ ନାଗରିକ କର୍ତ୍ତବ୍ୟର ସଠିକ୍ ପାଳନ ଅନ୍ତର୍ଭୁକ୍ତ। ଯଦି ବ୍ୟକ୍ତି ନିଜ ଭିତରେ ଏହି ପରିବର୍ତ୍ତନ ଆରମ୍ଭ କରନ୍ତି, ତେବେ ସମାଜ, ରାଷ୍ଟ୍ର ଏବଂ ବିଶ୍ୱରେ ସକାରାତ୍ମକ ପରିବର୍ତ୍ତନ ସମ୍ଭବ ହୋଇ ପାରିବ । କେସିଙ୍ଗା ଜଗନ୍ନାଥ ଛକରେ ଆୟୋଜିତ ଏକ ବିଶାଳ ହିନ୍ଦୁ ସମ୍ମିଳନୀରେ ଅଖିଳ ଭାରତୀୟ ସଦ୍ଭାବନା ପ୍ରମୁଖ ଡ. ଗୋପାଳ ପ୍ରସାଦ ମହାପାତ୍ର ଏହି ମତ ପ୍ରକାଶ କରିଥିଲେ। ତାଙ୍କ ଅଭିଭାଷଣରେ ସେ କହିଥିଲେ ଯେ ଆଜି ଆମ ପାଖରେ ହିନ୍ଦୁ ସଂଗଠନ ଏବଂ ସମାଜ ବିଷୟରେ ଆଲୋଚନା କରିବା ପାଇଁ ସମୟ ନାହିଁ, କିନ୍ତୁ କୌଣସି ମନୋରଞ୍ଜନ କାର୍ଯ୍ୟକ୍ରମ ହେଲେ ମଣ୍ଡପ ନିକଟରେ ସୋରିଶ ପକାଇବା ପାଇଁ ସ୍ଥାନ ମିଳେ ନାହିଁ । ଏହା ହେଉଛି ଆଜି ହିନ୍ଦୁ ସମାଜର ପ୍ରକୃତ ଅବସ୍ଥା। ଯଦି ଏହାକୁ ଏବେ ଗମ୍ଭୀରତାର ସହିତ ବିଚାର କରାଯାଏ ନାହିଁ, ତେବେ ଆଗାମୀ ପଚାଶ ବର୍ଷ ମଧ୍ୟରେ, ଆମର ଲୁହ ପୋଛିବା ପାଇଁ କେହି ରହିବେ ନାହିଁ। ଆରଏସଏସ ପ୍ରତିଷ୍ଠାତା ଡକ୍ଟର ହେଡଗେୱାରଙ୍କୁ ସ୍ମରଣ କରି ସେ କହିଥିଲେ ଯେ ସେ ଯେତେବେଳେ ରାଷ୍ଟ୍ରୀୟ ସ୍ୱୟଂସେବକ ସଂଘର ପ୍ରତିଷ୍ଠା କରିଥିଲେ ସେ ସମୟରେ ହିନ୍ଦୁ ବୋଲି କହିବାକୁ ଲୋକମାନେ ସଂକୋଚ କରୁଥିଲେ।
ସେ କହିଥିଲେ ଯେ ଏକାଠି ବସିବା, ଏକାଠି ଚିନ୍ତା କରିବା ଏବଂ ଯୋଗାଯୋଗ କରିବା ଆମର ସ୍ୱାଭାବିକ ପ୍ରବୃତ୍ତି, ଏବଂ ଏହି ଉଦ୍ଦେଶ୍ୟରେ ଏପରି ସମ୍ମିଳନୀ ଅନୁଷ୍ଠିତ ହେଉଛି ।
ଡ. ମହାପାତ୍ର କହିଥିଲେ ଯେ ହିନ୍ଦୁ ସମାଜ ସର୍ବଦା ବିଶ୍ୱକୁ ଦେଇଛି, କେବେ କାହାଠାରୁ କିଛି ଛଡ଼ାଇ ନେଇନାହିଁ। ତେଣୁ, ଆମେ ଆମର କର୍ତ୍ତବ୍ୟ କେତେ ପୂରଣ କରିଛୁ ତାହା ଉପରେ ଆମକୁ ଆତ୍ମନିରୀକ୍ଷଣ କରିବାକୁ ପଡିବ। କେବଳ ତଟସ୍ତ ଭାବେ ନିଷ୍କ୍ରିୟ ହୋଇ ବସି ରହିଲେ କିଛି ହାସଲ ହେବ ନାହିଁ। ହିନ୍ଦୁ ସମାଜ ସର୍ବଦା ଜନ କଲ୍ୟାଣର ଭାବନା ଦ୍ୱାରା ପ୍ରେରିତ ହୋଇଆସିଛି ଏବଂ କାହାକୁ ଶୋଷଣ କରେ ନାହିଁ। ଯେଉଁମାନେ ନିଜର ପ୍ରତିଶ୍ରୁତି ଏବଂ କର୍ତ୍ତବ୍ୟ ପାଳନ କରନ୍ତି ସେମାନେ ହିଁ ପ୍ରକୃତ ହିନ୍ଦୁ। ପ୍ରଭୁ ଶ୍ରୀରାମଙ୍କ ଉଦାହରଣ ଦେଇ ସେ କହିଥିଲେ ଯେ ପ୍ରଭୁ ରାମ ମର୍ଯ୍ୟାଦା ପ୍ରତିଷ୍ଠା କରିଥିଲେ, ଉତ୍ତରରୁ ଦକ୍ଷିଣ ପର୍ଯ୍ୟନ୍ତ ସମାଜକୁ ଏକ କରିଥିଲେ ଏବଂ ଅଧର୍ମକୁ ବିନାଶ କରିଥିଲେ।