ଆଇସିଏମଆର୍-ଆରଏମଆରସି ଭୁବନେଶ୍ୱରରେ ଅନୁଷ୍ଠିତ ହେଲା ‘ସାଇନ ୨୦୨୫’
ଆଇସିଏମଆର-ଆଞ୍ଚଳିକ ଭେଷଜ ଗବେଷଣା କେନ୍ଦ୍ର (ଆରଏମଆରସି), ଭୁବନେଶ୍ବର ପକ୍ଷରୁ ୮ ଅଗଷ୍ଟ ୨୦୨୫ରେ ଆଇସିଏମଆର-ସାଇନ ( ନୂଆ ପିଢିର ଗବେଷକଙ୍କ ପାଇଁ ବିଜ୍ଞାନ ଓ ସ୍ବାସ୍ଥ୍ୟ ଉଦ୍ଭାବନ) କାର୍ଯ୍ୟକ୍ରମ-୨୦୨୫ ଅନୁଷ୍ଠିତ ହୋଇଯାଇଛି । କିମ୍ବଦନ୍ତୀ ବୈଜ୍ଞାନିକ ପ୍ରଫେସର ଭି. ରାମଲିଙ୍ଗସ୍ବାମୀଙ୍କ ଜନ୍ମବାର୍ଷିକୀ ପାଳନ ଅବସରରେ ଏହି କାର୍ଯ୍ୟକ୍ରମ ସାରା ଦେଶରେ ଥିବା ୨୮ଟି ଆଇସିଏମଆର ପ୍ରତିଷ୍ଠାନ ଓ ଫିଲଡ୍ ୟୁନିଟ୍ ମାଧ୍ୟମରେ ଆୟୋଜନ ହୋଇଥିଲା ।
ସାଇନ କାର୍ଯ୍ୟକ୍ରମର ଲକ୍ଷ୍ୟ ହେଉଛି ସ୍କୁଲ ଛାତ୍ରଛାତ୍ରୀମାନଙ୍କୁ ଜୈବ ଚିକିତ୍ସା ଗବେଷଣା ଏବଂ ନବସୃଜନ ସହିତ ପ୍ରତ୍ୟକ୍ଷ ସମ୍ପର୍କକୁ ଦର୍ଶାଇ ସେମାନଙ୍କ ମଧ୍ୟରେ ବୈଜ୍ଞାନିକ କୌତୁହଳ ଏବଂ ଜନସ୍ୱାସ୍ଥ୍ୟ ସଚେତନତା ସୃଷ୍ଟି କରିବା। ଭୁବନେଶ୍ୱରରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଭୁବନେଶ୍ବର ସହର ଏବଂ ଆଖପାଖର ବିଭିନ୍ନ ସ୍କୁଲର ୯ମରୁ ଦ୍ୱାଦଶ ଶ୍ରେଣୀର ପ୍ରାୟ ୪୦୦ ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ।
ଏହି କାର୍ଯ୍ୟକ୍ରମକୁ ଭାରତୀୟ ଭେଷଜ ଗବେଷଣା ପରିଷଦ ( ଆଇସିଏମଆର)ର ମହାନିର୍ଦ୍ଦେଶକ ଡକ୍ଟର ରାଜୀବ ବହଲ ଭର୍ଚୁଆଲ୍ ଭାବରେ ଉଦଘାଟନ କରିଥିଲେ । କୋଭିଡ୍-୧୯ ମହାମାରୀ ସମୟରେ ଆଇସିଏମଆରର ଭୂମିକା ଉପରେ ଗୁରୁତ୍ୱାରୋପ କରି, ଡକ୍ଟର ବହଲ ଟୀକା ବିକାଶ, ରୋଗ ନିର୍ଣ୍ଣୟ ପରୀକ୍ଷା ଏବଂ ଚିକିତ୍ସା ପ୍ରୋଟୋକଲରେ ଆଇସିଏମଆରର ଅବଦାନ ଉପରେ ଆଲୋକପାତ କରିଥିଲେ। ସେ ଛାତ୍ରଛାତ୍ରୀମାନଙ୍କୁ ଗବେଷଣା ପ୍ରତିଷ୍ଠାନ ପରିଦର୍ଶନ କରିବାକୁ ଏବଂ ବୈଜ୍ଞାନିକଙ୍କ ପରି ଚିନ୍ତା କରିବାକୁ ଉତ୍ସାହିତ କରିଥିଲେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ‘ମନ କି ବାତ’ରେ ବିଜ୍ଞାନକୁ ଯୁବ ମନର ଜୀବନର ଏକ ଅଂଶ କରିବା ପାଇଁ କରିଥିବା ଆହ୍ବାନକୁ ପ୍ରତିଫଳିତ କରିଥିଲେ।
ସେ କହିଥିଲେ, ଆଜି ଆମେ ଆପଣମାନଙ୍କୁ ଏକ ବିଜ୍ଞାନାଗାର ଦେଖାଇବାକୁ ଚାହୁଁଛୁ । ଆମେ ଚାହୁଁଛୁ ଯେ ଆପଣମାନେ ଜଣେ ଜଣେ ବୈଜ୍ଞାନିକ ପରି ଚିନ୍ତା ଓ କାମ କରନ୍ତୁ ଏବଂ ଜାଣନ୍ତୁ ଯେ ଜଣେ ବୈଜ୍ଞାନିକ କ’ଣ କରନ୍ତି । ଗବେଷଣା ଓ ଉଦ୍ଭାବନର ଅର୍ଥ ହେଉଛି ସମାଜର ଉପକାରରେ ଲାଗୁଥିବା ଟେକନଲୋଜୀର ବିକାଶ, ଠିକ ଯେପରି ଆଇସିଏମଆର ଦ୍ବାରା ବିକଶିତ ଡିଏନଏ ଓ ଆରଏନଏ ଭିତ୍ତିକ ପଦ୍ଧତି ମାଧ୍ୟମରେ ଯକ୍ଷ୍ମାର ରାପିଡ ଟେଷ୍ଟିଂ ।
ଏହି ଅବସରରେ ଆଇସିଏମଆରର ଅତିରିକ୍ତ ମହାନିର୍ଦ୍ଦେଶିକା ତଥା ଆଇସିଏମଆର-ଆରଏମଆରସି ଭୁବନେଶ୍ୱରର ନିର୍ଦ୍ଦେଶିକା ଡ. ସଂଘମିତ୍ରା ପତି ଭାଷଣ ଦେଇଥିଲେ । ସେ ଆଇସିଏମଆରର ସମୃଦ୍ଧ ପରମ୍ପରା ସଂପର୍କରେ ଓ କୋଭିଡ-୧୯ ମହାମାରୀ ସମୟରେ ଏହାର ଗୁରୁତ୍ବପୂର୍ଣ୍ଣ ଭୂମିକା ସଂପର୍କରେ ଆଲୋକପାତ କରିଥିଲେ । ସେ କହିଥିଲେ ଯେ ବୈଜ୍ଞାନିକ ଗବେଷଣା କେବଳ ପରୀକ୍ଷାନିରୀକ୍ଷା ନୁହେଁ, ବରଂ ଲୋକଙ୍କ ଜୀବନରେ ପରିବର୍ତ୍ତନ ଆଣିବା ଓ ସମାଜ ସମସ୍ୟାର ସମାଧାନ କରିବାକୁ ବୁଝାଏ ।
ଏହି କାର୍ଯ୍ୟକ୍ରମ ଅବସରରେ ମତବିନିମୟ ଅଧିବେଶନ ଆୟୋଜନ କରାଯିବା ସହ କେତେକ କ୍ଷୁଦ୍ର ଚଳଚ୍ଚିତ୍ରର ପ୍ରଦର୍ଶନ କରାଯାଇଥିଲା । ଏସବୁ କ୍ଷୁଦ୍ର ଚଳଚ୍ଚିତ୍ରଗୁଡ଼ିକର ବିଷୟ ଥିଲା ଆଇସିଏମଆର-ଆରଏମଆରସି ଭୁବନେଶ୍ବରର ଐତିହ୍ୟ, କୋଭାକ୍ସିନ ବିକାଶର କାହାଣୀ, ଡ୍ରୋନ ଭିତ୍ତିକ ଡାକ୍ତରୀ ସାମଗ୍ରୀ ଯୋଗାଣ ବ୍ୟବସ୍ଥା ଓ ‘ବିଷାଣୁ ଯୁଦ୍ଧ ଅଭ୍ୟାସ’-ମହାମାରୀ ପ୍ରସ୍ତୁତି ସଂପର୍କରେ ଏକ ସୂଚନା ।
ଏହି ଅବସରରେ ଛାତ୍ରଛାତ୍ରୀମାନଙ୍କୁ ବିଜ୍ଞାନାଗାର ପରିଦର୍ଶନରେ ନିଆଯାଇଥିଲା, ଲାଇଭ୍ ଡେମୋନଷ୍ଟ୍ରେସନ ଦେଖାଯାଇଥିଲା ଓ ଭୁବନେଶ୍ବର କେନ୍ଦ୍ରରେ ବର୍ତ୍ତମାନ ଜାରି ରହିଥିବା ଗବେଷଣା ସଂପର୍କରେ ଅବଗତ କରାଯାଇଥିଲା । ଏହା ପରେ ଏକ କୁଇଜ୍ ପ୍ରତିଯୋଗିତା ଏବଂ ବୈଜ୍ଞାନିକ-ଛାତ୍ରଛାତ୍ରୀଙ୍କ ମଧ୍ୟରେ ମତବିନିମୟ ଅନୁଷ୍ଠିତ ହୋଇଥିଲା । ଏହା ସେମାନଙ୍କୁ ପାଠ୍ୟପୁସ୍ତକ ବାହାରେ ବୈଜ୍ଞାନିକ ଅଭିଜ୍ଞତା ଏବଂ ଦୈନନ୍ଦିନ ଜୀବନରେ ଗବେଷଣାର ପ୍ରଭାବ ସଂପର୍କରେ ଜାଣିବାକୁ ଅନୁମତି ଦେଇଥିଲା।
ଏହା ପରେ ଛାତ୍ରଛାତ୍ରୀମାନଙ୍କୁ ସାର୍ଟିଫିକେଟ୍ ବଣ୍ଟନ, ଜଳପାନ ଏବଂ ଆଇସିଏମଆରର ମାସ୍କଟ୍ ଡକ୍ଟର କ୍ୟୁରିଓଙ୍କ ସହିତ ଏକ ସେଲ୍ଫି ସେସନ୍ ସହିତ କାର୍ଯ୍ୟକ୍ରମ ଶେଷ ହୋଇଥିଲା । ସାଇନ ଇନିସିଏଟିଭ୍ ୨୦୨୫ ଆଇସିଏମଆରର ପରବର୍ତ୍ତୀ ପିଢ଼ିର ବୈଜ୍ଞାନିକମାନଙ୍କୁ ଅନୁପ୍ରାଣିତ କରିବା ଏବଂ ବିଜ୍ଞାନରେ ନବସୃଜନ, ସ୍ୱାସ୍ଥ୍ୟ ସଚେତନତା ଏବଂ ଜନସାଧାରଣଙ୍କ ସହଭାଗିତାର ସଂସ୍କୃତିକୁ ପ୍ରୋତ୍ସାହିତ କରିବା ଲକ୍ଷ୍ୟରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବରେ କାର୍ଯ୍ୟ କରିଥିଲା।