ଆଜିର ପରିବର୍ତ୍ତିତ ବିଶ୍ୱରେ ଜାତୀୟ ସୁରକ୍ଷା କେବଳ ବାହ୍ୟ ବିପଦ ପର୍ଯ୍ୟନ୍ତ ସୀମିତ ନୁହେଁ, ବରଂ ଆଭ୍ୟନ୍ତରୀଣ ଚ୍ୟାଲେଞ୍ଜ ମଧ୍ୟ ସମାନ ଭାବରେ ଗମ୍ଭୀର ହୋଇଛି ବୋଲି ରାଷ୍ଟ୍ରୀୟ ସ୍ବୟଂସେବକ ସଂଘର ସରକାର୍ଯ୍ୟବାହ ଶ୍ରୀ ଦତ୍ତାତ୍ରେୟ ହୋସବାଲେ ପ୍ରକାଶ କରିଛନ୍ତି ।
ମୁମ୍ବାଇରେ ଆୟୋଜିତ ‘ହିମାଂଶୁ ରୟ ଲିଗାସି ପୁରସ୍କାର’ ସମାରୋହରେ ଯୋଗଦେଇ ଏହା କହିଥିଲେ। ସେ କହିଥିଲେ, “ଆଜି ଆମେ ଏପରି ଏକ ବିଶ୍ୱରେ ବାସ କରୁଛୁ ଯାହା ଅତ୍ୟନ୍ତ ପ୍ରଯୁକ୍ତିବିଦ୍ୟା ଭାବରେ ସଂଯୁକ୍ତ ଏବଂ ଯେଉଁଠାରେ ବିପଦ ନୂତନ ରୂପରେ ଉଭା ହେଉଛି। ଆଜି ସୁରକ୍ଷା ବିପଦ କେବଳ ସୀମାରେ ନୁହେଁ, ବରଂ ଆମେ ସାଇବର ଆକ୍ରମଣ, ଡ୍ରୋନ ମାଧ୍ୟମରେ ଅନୁପ୍ରବେଶ ଓ ଡିଜିଟାଲ ଗୁପ୍ତଚର ଭଳି ନୂତନ ଏବଂ ଜଟିଳ ବିପଦର ମଧ୍ୟ ସମ୍ମୁଖୀନ ହେଉଛୁ। ଏହି ନୀରବ ଯୁଦ୍ଧ ଯାହା ଦେଶ ଭିତରୁ ଆମ ବ୍ୟବସ୍ଥାକୁ ଟାର୍ଗେଟ କରୁଛି।”
ସେ କହିଥିଲେ ଯେ ଜାତୀୟ ସୁରକ୍ଷା ଆଉ କେବଳ ସେନା, ଗୁଇନ୍ଦା ବ୍ୟବସ୍ଥା କିମ୍ବା ସରକାରଙ୍କ ଦାୟିତ୍ୱ ନୁହେଁ। ଏଥିପାଇଁ ସମାଜର ପ୍ରତ୍ୟେକ ନାଗରିକ ସତର୍କ, ସଜାଗ ଏବଂ ଦାୟିତ୍ୱବାନ ହେବା ଆବଶ୍ୟକ। “ଆମ ଦେଶର ସୁରକ୍ଷା କେବଳ ସୀମାରେ ଠିଆ ହୋଇଥିବା ସାହସୀ ସୈନିକଙ୍କ ବଳରେ ନୁହେଁ, ବରଂ ପ୍ରତ୍ୟେକ ବସ୍ତି, ଗ୍ରାମ ଏବଂ ସହରରେ ରହୁଥିବା ସଚେତନ ନାଗରିକଙ୍କ ଦ୍ୱାରା ମଧ୍ୟ ସମ୍ଭବ।”
୨୦୧୪ ପରେ ଜମ୍ମୁ-କାଶ୍ମୀର ବାହାରେ ଦେଶରେ କୌଣସି ବଡ଼ ଆତଙ୍କବାଦୀ ଆକ୍ରମଣ ହୋଇନାହିଁ। ଏହା କୌଣସି ସଂଯୋଗ ନୁହେଁ, ବରଂ ଆମର ସୀମାର ଦୃଢ଼ ନଜର, ସୁରକ୍ଷା ଏଜେନ୍ସିଗୁଡ଼ିକ ମଧ୍ୟରେ ଉତ୍ତମ ସମନ୍ୱୟ ଏବଂ ଆଧୁନିକ ପ୍ରଯୁକ୍ତିବିଦ୍ୟା, ଅସ୍ତ୍ରଶସ୍ତ୍ର ଏବଂ ତାଲିମ ସହିତ ଆମର ବାହିନୀକୁ ସଜ୍ଜିତ କରିବା ପାଇଁ ସୁଚିନ୍ତିତ ପ୍ରୟାସର ପରିଣାମ।”
ସେ ଆଗ୍ରହ କରିଥିଲେ ଯେ ଏହି ଶକ୍ତିକୁ ବଜାୟ ରଖିବା ପାଇଁ ଦେଶର ‘ବିବିଧତାରେ ଏକତା’ରସନାତନ ପରମ୍ପରା ଏବଂ ଭାବନାକୁ ଆହୁରି ମଜବୁତ କରିବାକୁ ପଡିବ। ଏହା ଆମର ସାଂସ୍କୃତିକ ପରିଚୟର ମୂଳଦୁଆ। “ଆମର ବିରୋଧୀମାନେ – ସେମାନେ ବାହ୍ୟ ହେଉ କିମ୍ବା ଭିତରେ ଲୁଚି ରହି – ଆମର ଏହି ଏକତାକୁ ଭାଙ୍ଗିବାକୁ ଚେଷ୍ଟା କରୁଛନ୍ତି। ସେମାନେ ସାମ୍ପ୍ରଦାୟିକ ଉନ୍ମାଦ, ଭାଷା ବିବାଦ, ଆଞ୍ଚଳିକ ଅସନ୍ତୋଷ ଏବଂ ଜାତି ଉତ୍ତେଜନା ଭଳି ଉପାୟ ମାଧ୍ୟମରେ ଆମକୁ ବିଭାଜିତ କରିବାକୁ ଷଡ଼ଯନ୍ତ୍ର କରୁଛନ୍ତି।”
ସେ କହିଥିଲେ ଯେ ନାଗରିକତା ସଂଶୋଧନ ଆଇନ ବିରୋଧରେ ପ୍ରତିବାଦ ହେଉ, କୃଷକଙ୍କ ନାମରେ ଆନ୍ଦୋଳନ ହେଉ କିମ୍ବା ଅନ୍ୟ ସମୟରେ ସୃଷ୍ଟି ହୋଇଥିବା ବିଶୃଙ୍ଖଳା – ଏହି ସମସ୍ତ ଷଡ଼ଯନ୍ତ୍ର ସମାନ ଦିଗକୁ ଇଙ୍ଗିତ କରୁଛି… ଜାତିର ଏକତାକୁ ଭାଙ୍ଗିବା ପାଇଁ। “ଆମକୁ ଏହି ଷଡ଼ଯନ୍ତ୍ରଗୁଡ଼ିକୁ ବୁଝିବାକୁ ପଡିବ ଏବଂ ସେମାନଙ୍କ ବିରୁଦ୍ଧରେ ଏକତ୍ରିତ ହେବାକୁ ପଡିବ।”
ସେ ଦେଶବାସୀଙ୍କୁ ନିବେଦନ କରିଥିଲେ ଯେ “ଆସନ୍ତୁ ଆମେ ଆମର ମତଭେଦରୁ ଉପରକୁ ଉଠି ଆମର ଜାତୀୟ ପ୍ରତିବଦ୍ଧତାକୁ ସର୍ବୋଚ୍ଚ ରଖି ଏବଂ ଆମର ଦାୟିତ୍ୱକୁ ସର୍ବୋଚ୍ଚ ମନେ କରି ସଚେତନ, ଦାୟିତ୍ୱବାନ ଏବଂ ଦେଶପ୍ରେମୀ ନାଗରିକ ହେବା।”
ଶେଷରେ ସରକାର୍ଯ୍ୟବାହ ସ୍ୱର୍ଗତ ଆଇପିଏସ ଅଧିକାରୀ ହିମାଂଶୁ ରାୟଙ୍କ ସ୍ମୃତିରେ ‘ହିମାଂଶୁ ରାୟ ଲିଗାସି ପୁରସ୍କାର’ ପ୍ରତିଷ୍ଠା କରିବା ପାଇଁ ରାୟ ଏବଂ ତ୍ରିପାଠି ପରିବାରକୁ ଅଭିନନ୍ଦନ ଜଣାଇଥିଲେ। ସେ କହିଥିଲେ ଯେ “ହିମାଂଶୁ ରାୟ ଜଣେ ସାହସୀ, ବିଶ୍ୱସ୍ତ ଏବଂ ଜନ କଲ୍ୟାଣକାରୀ ଅଧିକାରୀ ଥିଲେ। ଚିକିତ୍ସା, ସଙ୍ଗୀତ ଏବଂ ଜାତୀୟ ସୁରକ୍ଷା ଭଳି ବିଭିନ୍ନ କ୍ଷେତ୍ରରେ ତାଙ୍କ ନାମରେ ଏହି ପୁରସ୍କାର ଆରମ୍ଭ କରିବା ତାଙ୍କ ମୂଲ୍ୟବୋଧ ଏବଂ ସେବା ଭାବନାକୁ ଜୀବନ୍ତ ରଖିବା ପାଇଁ ଏକ ପ୍ରଶଂସନୀୟ ପ୍ରୟାସ।”