ୱାଶିଂଟନ: ପାକିସ୍ତାନର ନୂତନ ଫିଲ୍ଡ ମାର୍ଶାଲ ସେନା ମୁଖ୍ୟ ସୟଦ ଅସୀମ ମୁନିର ସମ୍ପ୍ରତି ଆମେରିକାରେ ଅଛନ୍ତି। ସେ ଆମେରିକାରେ ଥିବା ପାକିସ୍ତାନୀ ସମ୍ପ୍ରଦାୟକୁ ସମ୍ବୋଧିତ କରିଥିଲେ। ମୁନିର ଏହି ସମ୍ବୋଧନରେ ଭାରତ ବିରୁଦ୍ଧରେ ବିଷ ଓଗାଳିବାର ଏକ ମାଧ୍ୟମ ଭାବେ ବ୍ୟବହାର କରିଥିଲେ।
ମୁନିର ଗତ ମେ’ ମାସରେ ହୋଇଥିବା ୪ ଦିନିଆ ସାମରିକ ସଂଘର୍ଷରେ ପାକିସ୍ତାନର ବିଜୟ ହୋଇଥିବା ନେଇ ମଞ୍ଚରେ ମିଥ୍ୟା କହିଥିଲେ। ଏହି ସମୟରେ ମୁନିର ଭାରତକୁ ଚ୍ୟାଲେଞ୍ଜ କରିଥିଲେ ଏବଂ ୧୯୭୧ ଯୁଦ୍ଧର ଲଜ୍ଜାଜନକ ପରାଜୟର ପ୍ରତିଶୋଧ ନେବାକୁ ଶପଥ ନେଇଥିଲେ। ମୁଲ୍ଲା ଜେନେରାଲ ଭାବରେ ଜଣାଶୁଣା ଅସୀମ ମୁନିର ମଧ୍ୟ କଶ୍ମୀର ଉପରେ ମନ୍ତବ୍ୟ ଦେଇଥିଲେ।
ସେ ସ୍ୱୀକାର କରିଥିଲେ, ଭାରତ ବିରୁଦ୍ଧରେ ଲଢ଼ିବା ପାଇଁ ଚୀନ୍ରୁ ଅସ୍ତ୍ରଶସ୍ତ୍ର ଏବଂ ପାକିସ୍ତାନ ସାମରିକ ଉପକରଣ ପାଇଥିଲା । କିନ୍ତୁ ପାକିସ୍ତାନ ଏହାକୁ ଯେଭଳି ବ୍ୟବହାର କରିଥିବା ତାହା ଦେଖି ଚୀନ୍ ମଧ୍ୟ ପ୍ରଭାବିତ ହୋଇଥିଲା। ଆତଙ୍କବାଦର ସବୁଠାରୁ ବଡ଼ ପୃଷ୍ଠପୋଷକ ପାକିସ୍ତାନରେ ଜିହାଦୀ ସଂଗଠନ ପାଇଁ ମୁନିର ଆମେରିକାକୁ ଦାୟୀ କରିଥିଲେ। ସେ କହିଥିଲେ ଯେ, ଆଫଗାନିସ୍ତାନ ଉପରେ ସୋଭିଏତ୍ ଆକ୍ରମଣ ପରେ, ଜିହାଦୀ ସଂସ୍କୃତି ପାକିସ୍ତାନକୁ ଆସିଥିଲା ଏବଂ ଏଥିପାଇଁ ଆମେରିକା ଦାୟୀ। ସେ କହିଥିଲେ, ଖୁବ୍ ଶୀଘ୍ର କଶ୍ମୀରକୁ ନେଇ ଭଲ ଖବର ଆସିବ।
ପାକିସ୍ତାନୀ ସାମ୍ବାଦିକ ଅଜାଜ ସୈୟଦ ଏକ ଟକ୍ ସୋ’ରେ କହିଛନ୍ତି, ପାକିସ୍ତାନ ସେନା ମୁଖ୍ୟ ସୈୟଦ ଅସୀମ ମୁନିର କହିଥିଲେ ସେମାନେ ଭାରତର ବିଭାଜନ କରି ୧୯୭୧ ଯୁଦ୍ଧର ପ୍ରତିଶୋଧ ନେବେ।
ଅସୀମ ମୁନିରଙ୍କ ଭାଷଣ ସମୟରେ ୱାଶିଂଟନରେ ଉପସ୍ଥିତ ଥିବା ପାକିସ୍ତାନୀ ନୋମାନ ମୁଗଲଙ୍କ ଅନୁସାରେ, ପାକିସ୍ତାନ ସେନା ମୁଖ୍ୟ କହିଥିଲେ, ଆମେ ଚୀନ୍ ସହିତ ମିଶି ଭାରତ ବିରୁଦ୍ଧରେ ଯୁଦ୍ଧ ଲଢୁଛୁ। ମୁଲ୍ଲା ମୁନିର ଏପ୍ରିଲ ୨୨ ରେ ପହଲଗାମ ଆକ୍ରମଣକୁ ଆତଙ୍କବାଦୀ ଆକ୍ରମଣ ଭାବରେ ଗ୍ରହଣ କରିବାକୁ ମନା କରିଦେଇଥିଲେ।
ଏହି ସମୟରେ ମୁନିର କହିଥିଲେ, ପାକିସ୍ତାନ ଭାରତ ବିରୁଦ୍ଧରେ ପାଞ୍ଚଟି ମୋର୍ଚ୍ଚାରେ ଯୁଦ୍ଧ କରିଥିଲା, ଯେଉଁଥିରେ ସାଇବର ଯୁଦ୍ଧ ମଧ୍ୟ ଅନ୍ତର୍ଭୁକ୍ତ। ମୁନିର ଦାବି କରିଥିଲେ, ପାକିସ୍ତାନୀ ସାଇବର ଆକ୍ରମଣକାରୀମାନେ ଭାରତର ୭୦ ପ୍ରତିଶତ ଗ୍ରୀଡ ଷ୍ଟେସନ ହ୍ୟାକ କରି ସେଗୁଡ଼ିକୁ ବନ୍ଦ କରିଦେଇଛନ୍ତି। ସେ ଦାବି କରିଥିଲେ, ପାକିସ୍ତାନୀ ଡ୍ରୋନ୍ଗୁଡ଼ିକ ଦିଲ୍ଲୀ ଏବଂ ଗୁଜରାଟ ପର୍ଯ୍ୟନ୍ତ ଯାଇଛନ୍ତି। ସେ ଭାରତୀୟ ଟ୍ରେନ୍ ସିଷ୍ଟମକୁ ହ୍ୟାକ କରିବାର ମିଥ୍ୟା ଦାବି ମଧ୍ୟ କରିଥିଲେ।