୫୦୦ ଶିଖ ସ୍ବଧର୍ମକୁ ଫେରିଲେ
ପିଲିଭିତ-ଉତ୍ତର ପ୍ରଦେଶର ପିଲିଭିତ ଜିଲ୍ଲାର ଭାରତ-ନେପାଳ ସୀମାବର୍ତ୍ତୀ ଗ୍ରାମଗୁଡ଼ିକରେ ବିଶ୍ୱ ହିନ୍ଦୁ ପରିଷଦ (ଭିଏଚପି) ଦ୍ୱାରା ଆୟୋଜିତ ଏକ କାର୍ଯ୍ୟକ୍ରମରେ ପ୍ରାୟ ୫୦୦ ଶିଖ ସ୍ବଧର୍ମକୁ ଫେରିଛନ୍ତି। ଏହି ଲୋକମାନେ ପୂର୍ବରୁ ଶିଖ ଧର୍ମ ଛାଡ଼ି ଖ୍ରୀଷ୍ଟିଆନ ହୋଇଯାଇଥିଲେ। ୨୩ ମଇ, ୨୦୨୫ ତାରିଖ ଶୁକ୍ରବାର ଦିନ ବେଲହା ଏବଂ ତାତରଗଞ୍ଜ ଗାଁରେ ଶିଖ ସମ୍ପ୍ରଦାୟର ଲୋକମାନେ ବହୁ ସଂଖ୍ୟାରେ ଉତ୍ସବରେ ଯୋଗ ଦେଇଥିଲେ।
ରିପୋର୍ଟ ଅନୁଯାୟୀ, VHP ଏହି ଗ୍ରାମଗୁଡ଼ିକରେ ଦୁଇ ଦିନ ପାଇଁ ଶିବିର ସ୍ଥାପନ କରିଥିଲା ଏବଂ ଲୋକମାନଙ୍କୁ ଶିଖ ଧର୍ମକୁ ଫେରାଇ ଆଣିବା ପାଇଁ ଏକ ସଚେତନତା ଅଭିଯାନ ଚଳାଇଥିଲା। ଏହି ସମୟରେ ସୁରକ୍ଷା ପାଇଁ ପୋଲିସ ଏବଂ ପ୍ରଶାସନ ପକ୍ଷରୁ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଥିଲା।
ଭିଏଚପିର ସଂଗଠନ ମନ୍ତ୍ରୀ ପ୍ରିନ୍ସ ଗୌର କହିଛନ୍ତି ଯେ ନେପାଳ ସୀମା ସଂଲଗ୍ନ ଗ୍ରାମଗୁଡ଼ିକରେ ଲୋକଙ୍କୁ ଭେଟି ସେମାନଙ୍କୁ ଶିଖ ଧର୍ମର ଗୁରୁତ୍ୱ ବୁଝାଯାଇଥିଲା। ଅନେକ ପରିବାର ସ୍ୱେଚ୍ଛାକୃତ ଭାବରେ ସ୍ବଧର୍ମକୁ ଫେରିବାକୁ ନିଷ୍ପତ୍ତି ନେଇଥିଲେ। ଗୁରୁଦ୍ୱାରା ପରିଚାଳନା କମିଟି ମଧ୍ୟ ଅମୃତପାନ ଭଳି ଧାର୍ମିକ କାର୍ଯ୍ୟକ୍ରମ ମାଧ୍ୟମରେ ୧୬୦ ପରିବାରକୁ ଶିଖ ଧର୍ମକୁ ଫେରାଇ ଆଣିଛି। ସେହି ସମୟରେ ଅନ୍ୟମାନଙ୍କୁ ଧର୍ମ ପରିବର୍ତ୍ତନ କରିବାକୁ ଉସୁକାଉଥିବା କିଛି ଲୋକଙ୍କୁ ମଧ୍ୟ ସାମାଜିକ ବୟକଟ କରାଯାଇଥିଲା।