୧୧ଗୋରୁ ସହ ଗାଡ଼ି ଜବତ, ୨ଗିରଫ
ଜଗତସିଂହପୁର, ୧୯/୧୧: ଜଗତସିଂହପୁର ପୁଲିସ ଗୁରୁବାର ସ୍ଥାନୀୟ ଦେଉଳିଗ୍ରାମେଶ୍ବରରୁ ଏକ ପିକଅପ ଗାଡିରେ ବାହାରକୁ ଚାଲାଣ ହେଉଥିବା ୧୧ଟି ଗୋରୁ ଜବତ କରିବା ସହ ଗାଡ଼ିର ଚାଳକ ଓ ସହାୟକଙ୍କୁ ଗିରଫ କରିଛି। ସ୍ଥାନୀୟ ଦେଉଳିଗ୍ରାମେଶ୍ଵର ଅଞ୍ଚଳରୁ ନିୟମିତ ଭାବେ ଗାଈ, ବାଛୁରୀ ଓ ମଇଁଷି ଚୋରା ଚାଲାଣ ହେଉଥିବା ନେଇ ଅଭିଯୋଗ ହୋଇ ଆସୁଥିଲା । ଜଗତସିଂହପୁର ପୁଲିସ ସ୍ଥାନୀୟ ଲୋକଙ୍କଠାରୁ ଖବର ପାଇ ଗାଡ଼ିକୁ ଧରିବା ପାଇଁ ଜଗି ରହିଥିଲା । ଗୋରୁ ବୋଝେଇ ଗାଡ଼ି ଦେଉଳିଗ୍ରାମେଶ୍ବରରୁ ବାହାରି ଜଇପୁର ଦେଇ କିଶୋରନଗର ଯାଇଥାନ୍ତା। ତେବେ ପୁଲିସ ଗାଡ଼ିକୁ ଅଟକାଇବାକୁ ଉଦ୍ୟମ କରିବା ସମୟରେ ଡ୍ରାଇଭର ଦ୍ରୁତ ଗତିରେ ପଳାଇବାକୁ ଉଦ୍ୟମ କରିଥିଲା। ପୁଲିସ ତରଡାପଡ଼ା ନିକଟରେ ଗାଡ଼ିକୁ ଅଟକାଇବାରେ ସକ୍ଷମ ହୋଇଥିଲା। ସ୍ଥାନୀୟ ଓହଳ ଗ୍ରାମର ମୀର ଜୁଲଫିକର ବେଗ ଓ ହେଲପର ଦେଉଳିଗ୍ରାମେଶ୍ବରର ସେକ ଜାଫରକୁ ଗିରଫ କରିଛି। ତେବେ ଗୋରୁ ଚାଲାଣ ଗାଡିରେ ୪ଟି ବଡ ଗାଈ ଓ ୭ଟି ବାଛୁରୀକୁ ଅତି ଦୟନୀୟ ଅବସ୍ଥା ଲଦାଯାଇ ଚାଲାଣ କରାଯାଉଥିଲା । ପୁଲିସ ଗାଈ ଓ ବାଛୁରୀ ସହ ବ୍ୟବହୃତ ଗାଡ଼ିକୁ ଜବତ କରିବା କିନ୍ତୁ ଗୋଚାଲଣ କରୁଥିବା ଦେଉଳିଗ୍ରାମେଶ୍ଵରର ଓ ଅନ୍ୟ ଜଣେ ବ୍ୟବସାୟୀଙ୍କ ନିକଟରେ ପୁଲିସ ପହଞ୍ଚି ପାରିନାହିଁ। ଅପରାହ୍ନରେ କୁଲଫିକର ଓ ଜାଫରକୁ ପୁଲିସ ଅଦାଲତ ଚାଲାଣ କରିଛି ।