ନୂଆଦିଲ୍ଲୀ, ୨୭/୧୧: ଆଗାମୀ ଚନ୍ଦ୍ରଯାନ-୪ ଅଭିଯାନ ପାଇଁ ଭାରତ ପ୍ରସ୍ତୁତି ଚଳାଇଛି। ଏଥିରେ ଏକ ବଡ଼ ରୋଭର ରହିବ ଯାହାର ଓଜନ ଚନ୍ଦ୍ରଯାନ-୩ର ପ୍ରଜ୍ଞାନଠାରୁ ୧୨ ଗୁଣ ଭାରୀ। ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ) ର ସ୍ପେସ୍ ଆପ୍ଲିକେସନ୍ ସେଣ୍ଟର (ଏସ୍ଏଏସି) ର ନିର୍ଦେଶକ ନୀଲେଶ ଦେଶାଇ କହିଛନ୍ତି ଯେ ନୂଆ ରୋଭରର ଓଜନ ୩୫୦ କିଲୋଗ୍ରାମ୍ ହେବ। ଚନ୍ଦ୍ରଯାନ-୩ ସମୟରେ ଚନ୍ଦ୍ରପୃଷ୍ଠକୁ ଯାଇଥିବା ୩୦ କିଲୋଗ୍ରାମ୍ ପ୍ରଜ୍ଞାନ ରୋଭର ତୁଳନାରେ ଆକାର ଓ କ୍ଷମତାରେ ଏହା ପ୍ରାୟ ୧୨ ଗୁଣ ବଡ଼ ଚନ୍ଦ୍ରଯାନ-୪ ମିସନର ଲକ୍ଷ୍ୟ କେବଳ ଚନ୍ଦ୍ରରେ ଅବତରଣ କରିବା ନୁହେଁ ବରଂ ଚନ୍ଦ୍ର ନମୁନା ସଂଗ୍ରହ କରି ପୃଥିବୀକୁ ଫେରାଇ ଆଣିବା, ଯାହା ଭାରତକୁ ଏଭଳି ଜଟିଳ ମହାକାଶ ଅଭିଯାନରେ ସକ୍ଷମ ରାଷ୍ଟ୍ରମାନଙ୍କର ଏକ ଏଲିଟ୍ ଗ୍ରୁପ୍ ମଧ୍ୟରେ ସ୍ଥାନିତ କରିବ। ରୋଭରର ବର୍ଦ୍ଧିତ ଓଜନ ଓ ଅଧିକ ବ୍ୟାପକ ବୈଜ୍ଞାନିକ ପେଲୋଡ୍ ଏକ ବୃହତ୍ ଅନୁସନ୍ଧାନ କ୍ଷେତ୍ର ପାଇଁ ଅନୁମତି ଦେବ। ପ୍ରଜ୍ଞାନ ୫୦୦ ମିଟର x ୫୦୦ ମିଟରଅଞ୍ଚଳ କଭର କରିଥିବା ବେଳେ ନୂଆ ରୋଭର ୧ କିଲୋମିଟର X ୧ କିଲୋମିଟର ପରିବ୍ୟାପ୍ତ ଏକ ବୃହତ୍ ଅଞ୍ଚଳକୁ କଭର କରିବ ଏବଂ ଚନ୍ଦ୍ର ଗବେଷଣା ପରିସରକୁ ଯଥେଷ୍ଟ ବୃଦ୍ଧି କରିବା ସରକାରଙ୍କ ଅନୁମୋଦନ ମିଳିଲେ ୨୦୩୦ ସୁଦ୍ଧା ଏହି ମିସନ କାର୍ଯ୍ୟକାରୀ ହେବ ବୋଲି ଦେଶାଇ କହିଛନ୍ତି। ତେବେ ଇସ୍ରୋର ଅନ୍ୟ ଅଧିକାରୀମାନେ ୨୦୨୭ ସୁଦ୍ଧା ଏହାର ଉତ୍କ୍ଷେପଣ ହୋଇପାରେ ବୋଲି କହିଛନ୍ତି| ଚନ୍ଦ୍ରଯାନ-୪ ଅଭିଯାନ ଭାରତର ଦୀର୍ଘମିଆଦୀ ମହାକାଶ ଗବେଷଣା ରଣନୀତିର ଏକ ଅଂଶ, ଯେଉଁଥିରେ ୨୦୪୦ ସୁଦ୍ଧା ମାନବଯୁକ୍ତ ଚନ୍ଦ୍ର ଅଭିଯାନ ଏବଂ ୨୦୫୦ ସୁଦ୍ଧା ଏକ ଚନ୍ଦ୍ରଘାଟି ପ୍ରତିଷ୍ଠା ଯୋଜନା ଅନ୍ତର୍ଭୁକ୍ତ ।