ଡ. ସମନ୍ୱୟ ନନ୍ଦ–
ଏବେ କିଛି ଦିନ ତଳେ ଉତର ପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମୁମ୍ବାଇ ଯାଏ ଉତର ପ୍ରଦେଶରେ ଫିଲ୍ମ ସିଟି ନିର୍ମାଣ ନେଇ ବଲିଉଡର କିଛି ଲୋକଙ୍କ ସହ କଥାବାର୍ତା କରିଥିଲେ । ଏହି ବୈଠକ ଅତ୍ୟନ୍ତ ସାଧାରଣ ବୈଠକ ଥିଲା । ହେଲେ ଏହି ବୈଠକରେ ଆକ୍ଟର ସୁନୀଲ ଶେଟ୍ଟୀ ଯୋଗୀ ଆଦିତ୍ୟନାଥଙ୍କୁ ହଠାତ ଏକ ଗୁହାରୀ କରିବା ଦେଖିବାକୁ ମିଳିଥିଲା । ସେ କହିଥିଲେ “ଦର୍ଶକ ମାନେ ସିନେମା ହଲକୁ ଆସୁ ନାହାନ୍ତି, ସେମାନଙ୍କୁ ସିନେମାହଲକୁ ଅଣା ଯିବା ବଡ ଜରୁରୀ । ବୟକଟ ବଲିଉଡ ନାମରେ ଯେଉଁ ହ୍ୟାସଟାଗ ଚଳା ଯାଉଛି, ତାହା ଆପଣଙ୍କର (ଯୋଗୀ)ଙ୍କ କହିବା ପରେ ବନ୍ଦ ହୋଇ ଯାଇପାରେ । ଆମେ ଖୁବ ଭଲ କାମ କରି ସାରିଛୁ । ପଚି ଯାଇଥିବ ସେଓ ସବୁ ସ୍ଥାନରେ ଥାଏ ହେଲେ ଆପଣ ଆମ ସମସ୍ତଙ୍କୁ ସେଭଳି ଭାବି ପାରିବେ ନାହିାଁ ”
ସେ ଆହୁରି କହିଥିଲେ ଯେ “ ଦର୍ଶକ ମାନଙ୍କ ମନରେ ଗୋଟିଏ କଥା ପଶି ଯାଇଛି ଯେ ବଲିଉଡ ବା ହିନ୍ଦୀ ଫିଲ୍ମ ଇଣ୍ଡଷ୍ଟ୍ରିରେ ଭଲ ଲୋକ ନାହାନ୍ତି । ବଲିଉଡରେ ୯୯ ପ୍ରତିଶତ ଲୋକ ସେପରି ନାହାନ୍ତି ଓ ସମସ୍ତେ ଦିନ ବେଳେ ଡ୍ରଗ୍ସ ନିଅନ୍ତି ନାହିଁ ।” ସେ ଏତିକିରେ ଅଟକି ନ ଥିଲେ । ସେ ଯୋଗୀଙ୍କୁ ଏହି କଥା ପ୍ରଧାନମନ୍ତ୍ରୀ ମୋଦୀ ପର୍ଯ୍ୟନ୍ତ ଏହି କଥା ପହଂଚାଇବାକୁ ଅନୁରୋଧ କରିଥିଲେ ।
ସୁନୀଲ ଶେଟ୍ଟୀ ଉଠାଇଥିବା ପ୍ରସଙ୍ଗ ଉପରେ ଯୋଗୀ ଆଦିତ୍ୟନାଥ ଯାହା ଉତର ଦେଇଥିବେ ତାହା ଭିନ୍ନ କଥା । ଏହି କଥାକୁ ସୁନୀଲ ଶେଟ୍ଟୀ ନିଜେ ଉଠାଇ ଥାଇ ପାରନ୍ତି ବା ବଲିଉଡର ଆଉ କେହି ବଡ ଲୋକ ତାଙ୍କୁ ଉଠାଇବାକୁ କହିଥାଇ ପାରେ । ହେଲେ ସୁନୀଲ ଶେଟ୍ଟୀ ବା ତାଙ୍କୁ ଏହି କଥା ଉଠାଇବାକୁ କହିଥିବା ବଲିଉଡର ଅନ୍ୟ ଲୋକ ମାନଙ୍କର ବଲିଉଡକୁ ବୟକଟ କରିବାକୁ କରା ଯାଉଥିବା ଆହ୍ୱାନକୁ ନେଇ କୌଣସି ପ୍ରକାର ବାସ୍ତବିକ ଜ୍ଞାନ ନ ଥିବା ସ୍ପଷ୍ଟ ହୋଇଛି ।
ବଲିଉଡର ଲୋକଙ୍କ ମତ ହେଲା ଯେ ଯୋଗୀ ଆଦିତ୍ୟନାଥ କହିଲେ ବୟକଟ ବଲିଉଡ ଅଭିଯାନକୁ ରୋକା ଯାଇ ପାରିବ । ତେବେ ପ୍ରଶ୍ନ ଉଠୁଛି ଯେ ଯୋଗୀ ଆଦିତ୍ୟନାଥ କଣ ଏହି ଅଭିଯାନକୁ ଆରମ୍ଭ କରିଛନ୍ତି ଯେ ସେ କହିଲେ ଲୋକ ମାନେ ଏହାକୁ ବନ୍ଦ କରି ଦେବେ । ଦେଶରେ ବଲିଉଡ ବିରୋଧରେ ତିଆରି ହୋଇଥିବା ଏହି ବାତାବରଣରେ ଦେଶର ସାଧାରଣ ଲୋକ ମାନେ ଅଛନ୍ତି । ଏହି ସାଧାରଣ ଲୋକ ମାନେ କେବେ ଏହି ବଲିଉଡର ଲୋକ ମାନଙ୍କୁ ହିରୋ ସଜାଇଥିଲେ । ବଲିଉଡ ଯେଭଳି ଭାବେ ଫିଲ୍ମ ଜରିଆରେ ଅଶ୍ଲୀଳତା, ହିନ୍ଦୁ ବିରୋଧ, ପାକିସ୍ତାନ ପ୍ରେମ, ବୋକ ସଂସ୍କୃତିକୁ ପ୍ରୋତ୍ସାହନ, ଇସଲାମିଷ୍ଟ ମାନଙ୍କର ମହିମାମଣ୍ଡନ ଆଦି କରୁଛି ସେହି କାରଣରୁ ଦେଶର ସାଧାରଣ ଲୋକ ମାନଙ୍କର ବଲିଉଡ ପ୍ରତି ମୋହଭଙ୍ଗ ହୋଇଛି । ତେଣୁ ସେମାନେ ବଲିଉଡକୁ ବହିଷ୍କାର କରିବାକୁ ଅପିଲ କରୁଛନ୍ତି ।
ଏଠାରେ ସୁନୀଲ ଶେଟ୍ଟୀ ଜଣେ ବ୍ୟକ୍ତି ନୁହନ୍ତି । ସେ ବଲିଉଡର ପ୍ରତିନିଧି । ସେ ଯାହା କହୁଛନ୍ତି ତାହା ବଲିଉଡ କହୁଛି ବୋଲି ଧରିବାକୁ ପଡିବ । ଯେପରିକି ଉଲ୍ଲେଖ କରା ଯାଇଛି ଯେ ଦେଶର ଲୋକ ମାନେ ଏହି ବଲିଉଡକୁ ବହିଷ୍କାର ପାଇଁ ଅପିଲ କରୁଛନ୍ତି । ବଲିଉଡକୁ ବହିଷ୍କାର କରିବାକୁ ଅପିଲ କରି ଦେଶବାସୀ କୌଣସି ଅପରାଧ କରୁ ନାହାନ୍ତି । ଗଣତନ୍ତ୍ରରେ ସମସ୍ତଙ୍କୁ ଶାନ୍ତିପୂର୍ଣ ଭାବେ ବିରୋଧ କରିବାର ଅଧିକାର ରହିଛି । ଦେଶର ଲୋକ ମାନେ ଏହି ଅଧିକାରକୁ ହିଁ ବ୍ୟବହାର କରୁଛନ୍ତି । ଇଂରେଜ ମାନେ ଶାସନରେ ଥିବା ବେଳେ ଭାରତୀୟ ମାନେ କେବେ ଏହି ଭଳି ଅସହଯୋଗ ଆନେ୍ଦାଳନ କରିଥିଲେ । ଏବେ ବଲିଉଡ ବିରୁଦ୍ଧରେ ଲୋକ ମାନେ ସେହି ସମାନ କାମ କରୁଛନ୍ତି । ତେଣୁ ସେମାନେ କୌଣସି ପ୍ରକାର ଅପରାଧ କରୁ ନାହାନ୍ତି ଏହା ସୁନୀଲ ଶେଟ୍ଟୀଙ୍କୁ ବୁଝିବାକୁ ପଡିବ ।
ଅନ୍ୟ ପକ୍ଷରେ ଯୋଗୀ ଆଦିତ୍ୟନାଥ କିମ୍ବା ପ୍ରଧାନମନ୍ତ୍ରୀ ମୋଦୀଙ୍କ କହିବା ଅନୁସାରେ ଏହି ଅଭିଯାନକୁ କେହି ଚଳାଉ ନାହାନ୍ତି । ଦେଶର ଲୋକ ମାନେ ବଲିଉଡର ଚରିତ୍ରକୁ ଦୀର୍ଘ ସମୟ ଧରି ଦେଖିବା ପେ ଏହି ଅଭିଯାନ ଚଳାଇଛନ୍ତି ।
ତେବେ ଗୋଟିଏ କଥାର ଉଲ୍ଲେଖ ଏଠାରେ କରିବା ସମୀଚିନ ହେବ ଯେ ପୂର୍ବରୁ ମଧ୍ୟ ବଲିଉଡର ଫିଲ୍ମକୁ ବୟକଟ କରିବାକୁ ଆହ୍ୱାନ ପୂର୍ବରୁ ମଧ୍ୟ କିଛି ଲୋକ ଦେଉଥିଲେ । ହେଲେ ତାହା ସଫଳ ହେଉ ନଥିଲା । ବରଂ ଏହାକୁ ବଲିଉଡର ଲୋକ ମାନେ ପବ୍ଲିସିଟିର ମାଧ୍ୟମ ବୋଲି ମନେ କରୁଥିଲେ ।
ସମସ୍ତଙ୍କର ମନେ ଥିବ ଗୁଜରାତରେ ନର୍ମଦା ନଦୀର ବନ୍ଧର ଉଚ୍ଚତା ବଢାଇବା ବିରୁଦ୍ଧରେ ମେଧା ପାଟକର ଧାରଣାରେ ବସିଥିଲେ । ନର୍ମଦା ନଦୀ ବନ୍ଧର ଉଚ୍ଚତା ବଢିଲେ ଗୁଜରାତର ଅନେକ ଜଳକ୍ଲିଷ୍ଟ ଅଂଚଳକୁ ପାଣି ପହଂଚିବାର ଥିଲା । ସେତେବେଳେ ହଠାତ ସେଠାରେ ପହଂଚିଥିଲେ ଆମିର ଖାନ । ଆମିର ଖାନଙ୍କ ଉକ୍ତ ବିଷୟ ଉପରେ ଜ୍ଞାନ ନ ଥିଲା । ତଥାପି ସେତେବେଳେ ସେ ମେଧାଙ୍କ ସମର୍ଥନରେ ପହଂଚିଥିଲେ । ଏହା ପରେ ତାଙ୍କର ଫିଲ୍ମ ଫନା ରିଲିଜ ହେବାର ଥିଲା । କିଛି ଲୋକ ମାନେ ତାଙ୍କ ଫିଲ୍ମକୁ ବୟକଟ କରିବାକୁ ଆହ୍ୱାନ କରିଥିଲେ । ହେଲେ ଫିଲ୍ମ ଉପରେ ଏହାର କୌଣସି ପ୍ରଭାବ ପଡି ନ ଥିଲା । ଫିଲ୍ମ ଭଲ ଚାଲିଥିଲା । ସେହିପରି ଆମିର ଖାନଙ୍କ ଏକ ଫିଲ୍ମ ପିକେ ରେ ହିନ୍ଦୁ ଦେବାଦେବୀଙ୍କୁ ଅତ୍ୟନ୍ତ ଖରାପ ଓ ଉପହାସ କରି ଦେଖା ଯାଇଥିଲା । ଲୋକ ମାନେ ଏହି ଫିଲ୍ମକୁ ବୟକଟ କରିବାକୁ ଆହ୍ୱାନ କରିଥିଲେ । ମାତ୍ର ବୟକଟର ଆହ୍ୱାନ ସଫଳ ହୋଇ ନ ଥିଲା । ପିକେ ଫିଲ୍ମଟି ଭଲ ସଫଳତା ଅର୍ଜନ କରିଥିଲା । ତେଣୁ ସେତେବେଳେ ଯାଏ ବଲିଉଡର ଲୋକ ମାନେ ବୟକଟ୍ ଅଭିଯାନକୁ ଗୁରୁତ୍ୱ ଦେଉ ନ ଥିଲେ । ଆମୀର ଖାନ ଏକ ସାକ୍ଷାତାକାରରେ କହିଥିଲେ ଯେ ଯେଉଁ ମାନେ ଫିଲ୍ମକୁ ଦେଖିବାକୁ ଚାହୁଁ ନାହାନ୍ତି ସେମାନେ ତାଙ୍କ ଫିଲ୍ମ ନ ଦେଖିବାକୁ ଆସନ୍ତୁ । ସେହିପରି କରୀନା କପୁର ଖାନ ଏକ ସାକ୍ଷାତକାରରେ ଆଉ ଏକ ପାଦ ଆଗକୁ ବଢି କହିଥିଲେ ଯେ – ଆମେ କଣ ଦର୍ଶକ ମାନଙ୍କୁ ନିମନ୍ତ୍ରଣ କରୁଛୁ କି । ଯାହାର ଦେଖିବାର ଇଚ୍ଛା ଅଛି ସେ ଆସୁ, ଯାହାର ଇଚ୍ଛା ନାହିଁ ସେ ନ ଆସୁ । ଏହା ବଲିଉଡର ଅହଂକାରର ସଂକେତ ଥିଲା ।
ଏବେ କିଛି ଦିନ ତଳେ ଆମିର ଖାନଙ୍କ ଲାଲ ସିଂହ ଚଢା ଓ ବ୍ରହ୍ମାସ୍ତ୍ର ଫିଲ୍ମକୁ ବୟକଟ କରାଯିବାକୁ ଅଭିଯାନ ପରେ ଫିଲ୍ମ ଗୁଡିକ ମାଡ ଖାଇଥିଲା । ତେଣୁ ଏବେକାର ବୟକଟ ବଲିଉଡ ସେମାନଙ୍କର ଅହଂକାରକୁ ଚୁରମାର କରି ଦେଇଛି । ତେଣୁ ସେମାନେ ଯୋଗୀ ଆଦିତ୍ୟନାଥଙ୍କ ନିକଟରେ ବୟକଟ ବଲିଉଡ ଅଭିଯାନକୁ ବନ୍ଦ କରିବାକୁ ଗୁହାରୀ କରୁଥିବା ଦେଖିବାକୁ ମିଳୁଛି ।
ସୁନୀଲ ଶେଟ୍ଟୀ ବା ବଲିଉଡ ଯଦି ନିଜକୁ ପ୍ରଶ୍ନ ପଚାରିଥାନ୍ତା ତେବେ ତାଙ୍କୁ ଯୋଗୀ ଆଦିତ୍ୟନାଥଙ୍କ ସମ୍ମୁଖରେ ଏପରି ଅନୁରୋଧ କରିବାର ଆବଶ୍ୟକତା ପଡି ନ ଥାନ୍ତା । ଲୋକମାନଙ୍କ ମନ ଉପରେ ଫିଲ୍ମର ଗଭୀର ପ୍ରଭାବ ପଡି ଥାଏ । ତେଣୁ ଏହାର ଲାଭ ଉଠାଇ ବଲିଉଡ ସୁନିୟୋଜିତ ଭାବେ ଦେଶରେ ବିଦେଶୀ ଇସଲାମୀ ଆକ୍ରମଣକାରୀ ମାନଙ୍କର ମହିମାମଣ୍ଡନ କରିବା, ଭାରତୀୟ ଦେବାଦେବୀଙ୍କୁ ଖରାପ ଭାବେ ଚିତ୍ରିତ କରିବା ଭାମ୍ର ଦେଶୀ ପରମ୍ପରା ଓ ସଂସ୍କୃତିିକୁ ଖରାପ ବୋଲି ଦର୍ଶାଇବା ଆଦି କାମ ଲଗାତାର କରି ଆସୁଛି । ସେହିପରି ମନ୍ଦିରର ପୂଜାରୀ ମାନଙ୍କୁ ଖରାପ ବୋଲି ଦେଖାଇବା ଓ ଅନ୍ୟ ପଟରେ ଚର୍ଚର ପାଦ୍ରୀକୁ ଓ ଇସଲାମକୁ ମାନୁଥିବା ବ୍ୟକ୍ତିକୁ ଭଲ ବୋଲି ଦେଖାଇବା, ହିନ୍ଦୁବାଦୀ ମାନଙ୍କୁ ଖରାପ ଭାବେ ଚିତ୍ରିତ କରିଥାନ୍ତି । ତେଣୁ ଏହି କାରଣରୁ ବଲିଉଡକୁ ବୟକଟ କରିବାକୁ ଆହ୍ୱାନ ଲୋକ ମାନେ ଦେଉଛନ୍ତି । ତେଣୁ ବଲିଉଡ ଏ ବାବଦରେ ଅଭିଯୋଗ ନ କରି ଆତ୍ମ ନୀରିକ୍ଷଣ କରିବା ଆବଶ୍ୟକ ।