ସମ୍ବଲପୁର: ଗତ ୨୦୨୩ ମସିହା ହନୁମାନ ଜୟନ୍ତୀ ସମୟରେ ସମ୍ବଲପୁରରେ ହିଂସା ମାମଲାରେ ସଂପୃକ୍ତ ପୁଲିସ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରାଯାଇଛି। ଆଜି ସଚେତନ ନାଗରିକମାନଙ୍କ ପକ୍ଷରୁ ଜିଲ୍ଲାପାଳଙ୍କ ଜରିଆରେ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଦିଆଯାଇଥିବା ଦାବିପତ୍ରରେ ନିର୍ଦ୍ଦିଷ୍ଟ ସଂପ୍ରଦାୟର ଲୋକଙ୍କୁ କେତେକ ପୁଲିସ ଅଧିକାରୀ ଉସୁକାଇ ହିଂସା ସୃଷ୍ଟି କରାଇଥିବା ଅଭିଯୋଗ କରାଯାଇଛି। ଦାବିପତ୍ରରେ ଦର୍ଶାଯାଇଛି ଯେ ହନୁମାନ ଜୟନ୍ତୀ ବାଇକ୍ ଶୋଭାଯାତ୍ରା ଉପରକୁ ଯୋଜନାବଦ୍ଧ ଭାବେ ଆକ୍ରମଣ କରାଇ ସମ୍ବଲପୁରର ଶାନ୍ତ ବାତାବରଣକୁ ଅଶାନ୍ତ କରିବାରେ ତତ୍କାଳୀନ ଆଇଜି, ଏସ୍ପି, ଅତିରିକ୍ତ ଏସ୍ପି, ସଦର ଏସ୍ତିପିଓ, ଧନୁପାଲି ଆଇଆଇସି, ଜଣେ ଏସ୍ଆଇଙ୍କ ଭୂମିକା ରହିଥିଲା। ଏଥିସହିତ ଜଣେ ଏଏସ୍ଆଇ ଏବଂ ତାଙ୍କ ପୁଅ ଏଥିରେ ମୁଖ୍ୟ ଭୂମିକା ନେଇଥିଲେ।
ହନୁମାନ ଜୟନ୍ତୀ ସମନ୍ଵୟ ସମିତିର କର୍ମକର୍ତ୍ତା ଦାମୋଦର କରଙ୍କୁ ମରଣାନ୍ତକ ଆକ୍ରମଣ ହୋଇଥିବା ବେଳେ ବହୁଲୋକ ଆହତ ହୋଇଥିଲେ। ପୁଣି ହନୁମାନଜୟନ୍ତୀ ଦିନ ଜଣେ ଆଦିବାସୀ ଯୁବକଙ୍କୁ ନିର୍ମମ ଭାବେ ହତ୍ୟା କରାଯାଇଥିବା ବେଳେ ଜଣେ ଗୁରୁତର ଆହତ ହୋଇଥିଲେ।
ହିଂସା ସୃଷ୍ଟି କରିଥିଲେ ସେମାନେ ସରକାରୀ ଜମିରେ ଘର ଓ ଦୋକାନ କରୁଛନ୍ତି | ସେସବୁ ଜମିକୁ ଜବରଦଖଲମୁକ୍ତ କରାଯିବା, ଯେଉଁ ଘର ଉପରୁ ହନୁମାନ ଭକ୍ତଙ୍କ ଉପରକୁ ପଥରମାଡ଼ ହୋଇଥିଲା ଆଉ ବୋମା ରଖାଯାଇଥିଲା, ସେସବୁ ଘରକୁ ତୁରନ୍ତ ଭାଂଗିବାକୁ ଦାବି କରାଯାଇଛି।
ଏସବୁ ପୁଲିସ ଅଧିକାରୀମାନେ ବିଜେଡିର ହାତବାରିସୀ ସାଜି ସମ୍ବଲପୁରରେ ହିଂସା ସୃଷ୍ଟି ପାଇଁ ଷଡ଼ଯନ୍ତ୍ର କରିଥିଲେ। ହନୁମାନ ଜୟନ୍ତୀ ଅବସରରେ ଯେଉଁ ନିରୀହ ହନୁମାନ ଭକ୍ତ ଓ କର୍ମକର୍ତ୍ତାଙ୍କୁ ମିଥ୍ୟା କେସ୍ରେ ଛନ୍ଦି ଜେଲ୍ ପଠାଯାଇଥିଲା, ସେସବୁ ମାମଲା ତୁରନ୍ତ ପ୍ରତ୍ୟାହାର କରିବାକୁ ଦାବି କରାଯାଇଛି। ସମ୍ବଲପୁର ହିଂସାର ତଦନ୍ତ କରିଥିବା ଜାତୀୟ ତଦନ୍ତକାରୀ ଦଳର ରିପୋର୍ଟ ଉପରେ କାର୍ଯ୍ୟାନୁଷ୍ଠାନ ନେବାକୁ ଦାବିପତ୍ରରେ ଉଲ୍ଲେଖ ରହିଛି। ହନୁମାନ ଜୟନ୍ତୀ ହିଂସାର ଏଆଇଏ ଦ୍ବାରା ତଦନ୍ତ ପାଇଁ ସୁପାରିସ ଓ ଦୋଷୀଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ପାଇଁ ବି ଦାବି କରାଯାଇଛି। ସେହିପରି ଗତ ୨୪ ବର୍ଷ ହେଲା ଜେଲ୍ ଦଣ୍ଡ ଭୋଗୁଥିବା ଦାରା ସିଂଙ୍କୁ ଜେଲ୍ରୁ ମୁକ୍ତ କରିବାକୁ ବି ଦାବି କରାଯାଇଛି।
ଅନିଲ ବେହେରାଙ୍କ ନେତୃତ୍ବରେ ଜିଲ୍ଲାପାଳଙ୍କୁ ଭେଟି ଦାବିପତ୍ର ଦେଇଥିବା ପ୍ରତିନିଧି ଦଳରେ ଫଣିଭୂଷଣ ମିଶ୍ର, ସମୀର ବାବୁ, ଅରୁଣ ଦାସ, ହୀରା ସିଂହ, ବିଶ୍ବରଂଜନ ଜେନା, ରୁଦ୍ର କଣ୍ଠ, ମଲକିତ ସିଂହ, ସୁଶାନ୍ତ ଭୋଇ, ହରି ହରିପାଲ, ରାଜବୀର ସିଂହ, ସୁବୋଧ ସିଂହ ପ୍ରମୁଖ ଉପସ୍ଥିତ ଥିଲେ।