ବେଜିଂ: ସିରିଆର କିଛି ଫଟୋ ଚୀନ୍ ଗୁପ୍ତଚର ସଂସ୍ଥାକୁ ଏକ ବଡ଼ ଝଟକା ଦେଇଛି। ଏହି ଫଟୋଗୁଡ଼ିକରେ ଚୀନ୍ର ଉଇଗର୍ ମୁସଲମାନମାନେ ଆଇଏସଆଇଏସ ଏବଂ ଅନ୍ୟ ଆତଙ୍କବାଦୀ ସଂଗଠନର ଆତଙ୍କବାଦୀଙ୍କ ସହ ଠିଆ ହୋଇଥିବା ଦେଖିବାକୁ ମିଳୁଛି।
ଚୀନ୍ର ଗୁପ୍ତଚର ସଂସ୍ଥା ସୂଚନା ପାଇଛି ଯେ, ଚୀନ୍ର ଉଇଗର୍ ମୁସଲମାନମାନଙ୍କୁ ଆତଙ୍କବାଦ ତାଲିମ ଦିଆଯାଉଛି ଏବଂ ସିରିଆରୁ ଆସିଥିବା ଫଟୋରେ ଚୀନ୍ ମୁସଲମାନମାନେ ଆତଙ୍କବାଦୀ ସଂଗଠନ ଇସଲାମିକ୍ ଷ୍ଟେଟ୍, ଅଲ କାଏଦା ଏବଂ ଅନ୍ୟାନ୍ୟ ଆତଙ୍କବାଦୀ ସଂଗଠନର ଆତଙ୍କବାଦୀଙ୍କ ସହ ଠିଆ ହୋଇଛନ୍ତି।
ସୂଚନାଯୋଗ୍ୟ, ଚୀନ୍ରେ ଉଇଗର୍ ମୁସଲମାନମାନଙ୍କ ପ୍ରତି ଅତ୍ୟାଚାରର ଖବର ସର୍ବଦା ରହିଆସିଛି। ମିଳିତ ଜାତିସଂଘ ମାନବ ଅଧିକାର ଆୟୋଗ ମଧ୍ୟ ଏନେଇ ଚୀନ୍କୁ ଅନେକ ଥର ଚେତାବନୀ ଦେଇଛନ୍ତି। ଚୀନ୍ ସରକାର ଏହି ଚେତାବନୀକୁ ଅଣଦେଖା କରୁଛନ୍ତି। ତେବେ ବର୍ତ୍ତମାନ ଯେଉଁ ଫଟୋଗୁଡ଼ିକ ବାହାରିଛି ତାହା ଚୀନ୍ ନିଦ ହଜାଇ ଦେଇଛି। ଏହା ସହିତ ପାକିସ୍ତାନର ପର୍ଦ୍ଦାଫାଶ୍ କରିଛି। ପାକିସ୍ତାନ ସମର୍ଥକ ଆତଙ୍କବାଦୀ ସଂଗଠନ ଉଇଗର୍ ମୁସଲମାନମାନଙ୍କୁ ଅସ୍ତ୍ରଶସ୍ତ୍ର ଏବଂ ଅନ୍ୟାନ୍ୟ କାର୍ଯ୍ୟକଳାପର ତାଲିମ ଦେଉଛି ବୋଲି କୁହାଯାଉଛି।
୧୪ ଜୁଲାଇ ୨୦୨୧ରେ, ପାକିସ୍ତାନର ଦାସୁ ଡ୍ୟାମ୍ରେ କାମ କରୁଥିବା ଚୀନ୍ର ଇଞ୍ଜିନିୟରମାନଙ୍କ ବସ୍ ଉପରେ ଆତଙ୍କବାଦୀ ଆକ୍ରମଣ ହୋଇଥିଲା। ଯାହା ପାକିସ୍ତାନୀ ଗୁପ୍ତଚର ଏବଂ ସୁରକ୍ଷା ଏଜେନ୍ସି ସହଯୋଗରେ ଚୀନ୍ ଦ୍ୱାରା ଅନୁସନ୍ଧାନ କରାଯାଇଥିଲା।
ଉଇଗର୍ ମୁସଲମାନମାନେ ଏହି ଆକ୍ରମଣରେ ଜଡିତ ଥିବା ଜଣାପଡିଥିଲା। ତେବେ ପାକିସ୍ତାନ ଚୀନ୍କୁ ବିଭ୍ରାନ୍ତ କରିବାକୁ ଚେଷ୍ଟା କରିଥିଲା ଏବଂ ଏହି ଘଟଣା ପାଇଁ ପିଟିଇ ଏବଂ ଅନ୍ୟ ଦେଶକୁ ଟାର୍ଗେଟ କରିଥିଲା। ଏହାକୁ ଚୀନ୍ ମଧ୍ୟ ସମ୍ପୂର୍ଣ୍ଣ ସମର୍ଥନ କରିଥିଲା।
୨୦୦୬ରେ, ଆମେରିକା ସେନା ଆଫଗାନିସ୍ତାନ ଏବଂ ପାକିସ୍ଥାନର ଯୁଦ୍ଧ ଅଞ୍ଚଳରୁ ୨୨ ଜଣ ଉଇଗର୍ ମୁସଲମାନଙ୍କୁ ଅଲ୍-କାଏଦା ସହ ଜଡିତ ଥିବା ସୂଚନାରେ ଗିରଫ କରିଥିଲା।
ସୂଚନାଯୋଗ୍ୟ, ୨୦୧୯ ପରଠାରୁ ଚୀନ୍ରେ କୌଣସି ଆତଙ୍କବାଦୀ ଆକ୍ରମଣ ହୋଇନାହିଁ। ତେବେ ଏହି ଫଟୋଗୁଡ଼ିକ ସାମ୍ନାକୁ ଆସିବା ପରେ ଉଇଗର୍ ମୁସଲମାନମାନଙ୍କ ମାଧ୍ୟମରେ ଚୀନ୍ ଉପରେ ଆତଙ୍କବାଦୀ ଆକ୍ରମଣ ହେବାର ଆଶଙ୍କା ବୃଦ୍ଧି ପାଇବାରେ ଲାଗିଛି।