ସମଗ୍ର ସମାଜକୁ ଏକ କରି ସାମାଜିକ ପରିବର୍ତ୍ତନ ଦିଗରେ ସଂଘର ଆଗକୁ ବଢିବାର ସଂକଳ୍ପ
ଦତ୍ତାତ୍ରେୟ ହୋସବାଲେ ପୁନର୍ବାର ସରକାର୍ଯ୍ୟବାହ ରୂପେ ନିର୍ବାଚିତ
ନାଗପୁର: ସାମାଜିକ ସମରସତା ସଂଘର ରଣନୀତିର ଏକ ଅଂଶ ନୁହେଁ, ବରଂ ଏହା ନିଷ୍ଠାର ବିଷୟ । ସମାଜର ସଜ୍ଜନ ଶକ୍ତିମାନଙ୍କର ଏକତ୍ରୀକରଣ ଏବଂ ସାମୂହିକ ପ୍ରୟାସ ଦ୍ୱାରା ସାମାଜିକ ପରିବର୍ତ୍ତନ ଘଟିଥାଏ । ସମଗ୍ର ସମାଜକୁ ଯୋଡି ସାମାଜିକ ପରିବର୍ତ୍ତନ ଦିଗରେ ସଂଘର ଆଗକୁ ବଢିବାର ସଂକଳ୍ପ । ରବିବାର ଦିନ ପ୍ରତିନିଧି ସଭାସ୍ଥଳରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ରାଷ୍ଟ୍ରୀୟ ସ୍ୱୟଂସେବକ ସଂଘର ପୁନଃ ନିର୍ବାଚିତ ସରକାର୍ଯ୍ୟବାହ ଦତ୍ତାତ୍ରେୟ ହୋସବାଲେଜୀ ଏହି ସୂଚନା ଦେଇଛନ୍ତି । ସରକାର୍ଯ୍ୟବାହଜୀ କହିଛନ୍ତି ଯେ ରାମଲାଲାଙ୍କ ପ୍ରାଣପ୍ରତିଷ୍ଠାର ଐତିହାସିକ ଘଟଣାରେ ସମଗ୍ର ସମାଜର ସକ୍ରିୟ ଅଂଶଗ୍ରହଣକୁ ଆମେ ସମସ୍ତେ ଅନୁଭବ କରିଛନ୍ତି ।
ନାଗପୁରରେ ଚାଲିଥିବା ତିନିଦିନିଆ ଅଖିଳ ଭାରତୀୟ ପ୍ରତିନିଧି ସଭାରେ ଆଗାମୀ ତିନିବର୍ଷ (୨୦୨୪- ୨୦୨୭) ପାଇଁ ଶ୍ରୀ ଦତ୍ତାତ୍ରେୟ ହୋସବଲେ ସର୍ବସମ୍ମତି କ୍ରମେ ସରକାର୍ଯ୍ୟବାହ ଭାବରେ ନିର୍ବାଚିତ ହୋଇଛନ୍ତି । ପ୍ରତିନିଧି ସଭା ସ୍ଥଳର ମହର୍ଷି ଦୟାନନ୍ଦ ସରସ୍ୱତୀ ପରିସରରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଅଖିଳ ଭାରତୀୟ ପ୍ରଚାରପ୍ରମୁଖ ସୁନୀଲ ଆମ୍ବେକରଜୀ ତାଙ୍କ ନିର୍ବାଚନ ସମ୍ପର୍କରେ ସୂଚନା ଦେଇ ତାଙ୍କୁ ଅଭିନନ୍ଦନ ଜଣାଇଛନ୍ତି । ସାମ୍ବାଦିକ ସମ୍ମିଳନୀରେ ଏକ ପ୍ରଶ୍ନର ଉତ୍ତର ଦେଇ ସରକାର୍ଯ୍ୟବାହଜୀ କହିଛନ୍ତି ଯେ ନିର୍ବାଚନ ହେଉଛି ଦେଶର ଗଣତନ୍ତ୍ରର ଏକ ମହାପର୍ବ । ଦେଶରେ ଗଣତନ୍ତ୍ର ଏବଂ ଏକତାକୁ ଅଧିକ ମଜବୁତ କରିବା ଏବଂ ପ୍ରଗତିର ଗତି ବଜାୟ ରଖିବା ଆବଶ୍ୟକ । ସଂଘର ସ୍ୱୟଂସେବକମାନେ ଶତପ୍ରତିଶତ ଭୋଟ ପାଇଁ ସମାଜରେ ଜନସଚେତନତା ସୃଷ୍ଟି କରିବେ । ଏହି ସନ୍ଦର୍ଭରେ ସମାଜରେ କୌଣସି ଶତ୍ରୁତା, ପୃଥକତା, ମତଭେଦ କିମ୍ବା ଏକତା ପାଇଁ କ୍ଷତିକାରକ ବିଷୟ ରହିବା ଉଚିତ୍ ନୁହେଁ । ସମାଜ ଏହି ବିଷୟରେ ଅବଗତ ହେବା ଉଚିତ୍ ।
ସେ କହିଛନ୍ତି ଯେ ସଂଘର କାର୍ଯ୍ୟ ଦେଶବ୍ୟାପୀ ରାଷ୍ଟ୍ରୀୟ ଅଭିଯାନ ପାଇଁ ଉଦ୍ଦିଷ୍ଟ । ଆମେ ସମସ୍ତେ ଗୋଟିଏ ସମାଜର, ଗୋଟିଏ ରାଷ୍ଟ୍ରର ବ୍ୟକ୍ତି ବିଶେଷ । ଆଗାମୀ ୨୦୨୫ ବିଜୟାଦଶମୀ ସୁଦ୍ଧା ପୂର୍ଣ୍ଣ ନଗର, ପୂର୍ଣ୍ଣ ମଣ୍ଡଳ ତଥା ପୂର୍ଣ୍ଣ ଖଣ୍ଡରେ ଦୈନିକ ଶାଖା ତଥା ସାପ୍ତାହିକ ମିଳନର ଲକ୍ଷ୍ୟ ପୂରଣ ହେବ । ସଂଘ କାର୍ଯ୍ୟର ପ୍ରଭାବ ଆଜି ସମାଜରେ ଦୃଶ୍ୟମାନ ହେଉଛି । ସଂଘ ପ୍ରତି ସମାଜର ଏହି ଆତ୍ମୀୟତାର ଭାବ ରହି ଆସୁଥିବାରୁ ଏହା ପ୍ରତି ସଂଘ ଗଭୀର କୃତଜ୍ଞତାର ଭାବ ରଖିଛି ।
ସେ କହିଛନ୍ତି ଯେ ସଂଘର ସ୍ୱପ୍ନ ହେଉଛି ସମଗ୍ର ସମାଜ ସଂଗଠିତ ହେବା ଆବଶ୍ୟକ । ପରିବେଶର ସୁରକ୍ଷା, ସାମାଜିକ ସମରସତା – ଏହା କୌଣସି ଏକ ସଂଗଠନର ଅଭିଯାନ ନୁହେଁ, ବରଂ ସମଗ୍ର ସମାଜର ଅଭିଯାନ । ଦେଶର ଅନେକ ଛୋଟ ଛୋଟ ଗାଁରେ ଉଚ୍ଚ-ନୀଚ୍ଚ, ଛୁଆଁ ଅଛୁଆଁ ଭେଦଭାବ ଦୃଶ୍ୟମାନ ହେଉଛି । ସହରଗୁଡ଼ିକରେ ଏହାର ପ୍ରଭାବ ବହୁତ କମ୍ । ଗାଁ ପୋଖରୀ, ମନ୍ଦିର ଏବଂ ଶ୍ମଶାନକୁ ନେଇ ସମାଜରେ କୌଣସି ଭେଦଭାବ ରହିବା ଉଚିତ ନୁହେଁ ।
ଅନ୍ୟ ଏକ ପ୍ରଶ୍ନର ଉତ୍ତରରେ ସେ କହିଛନ୍ତି ଯେ ପୀଡିତ ମହିଳାଙ୍କ ପ୍ରତିନିଧି ଦଳ ଭାରତର ରାଷ୍ଟ୍ରପତିଙ୍କୁ ଅନୁରୋଧ କରିଛନ୍ତି ଯେ ସନ୍ଦେଶଖାଲିର ଅପରାଧୀଙ୍କୁ କଠୋରରୁ କଠୋର ଦଣ୍ଡ ଦିଆଯାଉ । ସଂଘର ସମସ୍ତ କାର୍ଯ୍ୟକର୍ତ୍ତା ଏବଂ ସହଯୋଗୀ ସଂଗଠନର କାର୍ଯ୍ୟକର୍ତ୍ତା ପ୍ରତ୍ୟେକ ସ୍ତରରେ ସେମାନଙ୍କ ସହିତ ସକ୍ରିୟ ଭାବରେ ଠିଆ ହୋଇଛନ୍ତି ।
ସଂଖ୍ୟାଲଘୁ ସମସ୍ୟା ଉପରେ ସରକାର୍ଯ୍ୟବାହଜୀ କହିଛନ୍ତି ଯେ, ଆମେ ସଂଖ୍ୟାଲଘୁ ରାଜନୀତିକୁ ବିରୋଧ କରି ଆସୁଛୁ । ଦ୍ୱିତୀୟ ସରସଂଘଚାଳକ ଶ୍ରୀ ଗୁରୁଜୀଙ୍କ ସମୟରୁ ବର୍ତ୍ତମାନ ପର୍ଯ୍ୟନ୍ତ ସମସ୍ତ ସରସଂଘଚାଳକ ମୁସଲମାନ ଏବଂ ଖ୍ରୀଷ୍ଟିଆନ ନେତାଙ୍କ ସହ ଯୋଗାଯୋଗ ପୂର୍ବକ ସମନ୍ୱୟ ରକ୍ଷା କରି କାର୍ଯ୍ୟ କରି ଆସୁଛନ୍ତି ।
ନିକଟରେ ମଣିପୁରରେ ଘଟିଥିବା ସାମାଜିକ ବିବାଦ ଅତ୍ୟନ୍ତ ଯନ୍ତ୍ରଣାଦାୟକ ଅଟେ । ଏହି କ୍ଷତଗୁଡିକ ବହୁତ ଗଭୀର । କୁକି ଏବଂ ମୈତୈୟୀ ସମ୍ପ୍ରଦାୟରେ ସଂଘର କାର୍ଯ୍ୟ ଚାଲିଥିବା ହେତୁ ଆମେ ଉଭୟ ସମ୍ପ୍ରଦାୟର ନେତାଙ୍କ ସହ ଯୋଗାଯୋଗ କରି ପରିସ୍ଥିତିକୁ ସ୍ୱାଭାବିକ କରିବାକୁ ଚେଷ୍ଟା କରିଥିଲୁ, ଯେଉଁଥିରେ ଆମେ ସଫଳତା ମଧ୍ୟ ପାଇଥିଲୁ ।
ଛଅ ଜଣ ସହ-ସରକାର୍ଯ୍ୟବାହଙ୍କ ନିଯୁକ୍ତି
ରାଷ୍ଟ୍ରୀୟ ସ୍ୱୟଂସେବକ ସଂଘର ନୂତନ କାର୍ଯ୍ୟକାରିଣୀରେ ସରକାର୍ଯ୍ୟବାହ ଦତ୍ତାତ୍ରେୟ ହୋସବାଲେ ୨୦୨୪-୨୭ କାର୍ଯ୍ୟକାଳ ପାଇଁ ଛଅ ଜଣ ସରକାର୍ଯ୍ୟବାହଙ୍କୁ ନିଯୁକ୍ତ କରିଛନ୍ତି । ସେମାନେ ହେଲେ ଡ.କୃଷ୍ଣ ଗୋପାଳ, ସି.ଆର.ମୁକୁନ୍ଦ, ଅରୁଣ କୁମାର, ରାମଦତ୍ତ ଚକ୍ରଧର, ଅତୁଲ ଲିମୟେ ଓ ଆଲୋକ କୁମାର ।