ହାଙ୍ଗଝୌ: ଚାଇନାରେ ଚାଲିଥିବା
୧୯ତମ ଏସିଆନ ଗେମ୍ସରେ ଇତିହାସ ରଚିଛି
ଭାରତ । ୪୧ ବର୍ଷ ପରେ ପ୍ରଥମଥର ପାଇଁ
ଭାରତକୁ ଅଶ୍ୱ ଚାଳନାରେ ମିଳିଛି ସ୍ୱର୍ଣ୍ଣ । ୧୯୮୨
ଠାରୁ ଏଯାଏ ଭାରତ କେବେ ହେଲେ ଅଶ୍ୱ
ଚାଳନାରେ ସ୍ୱର୍ଣ୍ଣ ପଦକ ଜିତି ନଥିଲା । ହେଲେ
ଆଜି ଚାଇନାରେ ଅଶ୍ୱ ଚାଳନାର ଟିମ ଇଭେଣ୍ଟରେ
ଭାରତକୁ ଗୋଲ୍ଡ ମେଡାଲ ମିଳିଛି ।
ଭାରତ ୨୦୯.୨୦୫ ପଏଣ୍ଟ ସହ ପ୍ରଥମ
ସ୍ଥାନରେ ରହିଥିବା ବେଳେ ଚାଇନା
୨୦୪.୮୮୨ ପଏଣ୍ଟ ସହ ରୌପ ପଦକ ଓ
ହଂକଂ ଚାଇନା ୨୦୪.୮୨ ପଏଣ୍ଟ ସହ ବ୍ରୋଞ୍ଜ
ପଦକରେ ସନ୍ତୁଷ୍ଟ ହୋଇଛି ।
ଭାରତ ପକ୍ଷରୁ ସୁଦୀପ୍ତି ହାଜେଲା, ହ୍ରିଦୟ
ବିପୁଲ ଛେଡା, ଅନୁଶ ଗାରୱାଲ୍ଲା ଓ ଦିବ୍ୟାକରିତି
ସିଂହଙ୍କୁ ନେଇ ଗଠିତ ଟିମ ଅଶ୍ୱ ଚାଳନାର
ଡ୍ରେସଏଜ ଇଭେଣ୍ଟରେ ଐତିହାସିକ ସ୍ୱର୍ଣ୍ଣ
ଜିତିଛନ୍ତି । ଏହା ଡ୍ରେସଏଜ ଇଭେଣ୍ଟରେ ଭାରତର
ପ୍ରଥମ ସ୍ୱର୍ଣ୍ଣ । ସେହିପରି ଭାରତ ଅଶ୍ୱ ଚାଳନା
କ୍ରୀଡ଼ାରେ ୪ର୍ଥ ଥର ପାଇଁ ସ୍ୱର୍ଣ୍ଣ ଜିତିଛି ।
ଏହାପୂର୍ବରୁ ୧୯୮୨ ଏସିଆନ ଗେମ୍ସରେ ଭାରତ
ଅଶ୍ୱ ଚାଳନାରେ ୩ଟି ସ୍ୱର୍ଣ୍ଣ ଜିତିଥିଲା ।ଦିଲ୍ଲୀରେ
ଅନୁଷ୍ଠିତ ୧୯୮୨ ଏସିଆନ ଗେମ୍ସରେ ଭାରତର
ରଘୁବୀର ସିଂହ ବ୍ୟକ୍ତିଗତ ଅଶ୍ୱ ଚାଳନା
ଇଭେଣ୍ଟରେ ଚାମ୍ପିୟନ ହୋଇଥିଲେ । ସେ ମଧ୍ୟ
ଗୁଲାମ ମହମ୍ମଦ ଖାନ, ବିଶାଲ ସିଂହ ଓ ମିଖା
ସିଂହଙ୍କୁ ନେଇ ଗଠିତ ଭାରତୀୟ ଟିମ ପାଇଁ ମଧ୍ୟ
ସ୍ୱର୍ଣ୍ଣ ପଦକ ପକ୍କା କରିଥିଲେ ।
ଏହାବାଦ ଅଶ୍ୱ ଚାଳନାର ବ୍ୟକ୍ତିଗତ ଟେଣ୍ଟ
ପେଗିଙ୍ଗ ଇଭେଣ୍ଟରେ ଭାରତ ପାଇଁ ରୂପିନ୍ଦର ସିଂହ
ବ୍ରାର ଗୋଲ୍ଡ ପଦକ ହାତେଇଥିଲେ । ଏସିଆନ
ଗେମ୍ସର ଉକ୍ତ ସଂସ୍କରଣରେ ଏହି ଇଭେଣ୍ଟକୁ
ସାମିଲ କରାଯାଇଥିଲା ଓ ଭାରତ ପାଇଁ ରୂପିନ୍ଦର
ସ୍ୱର୍ଣ୍ଣ ପଦକ ମଧ୍ୟ ଜିତିଥିଲେ ।
୨୦୧୮ ଜାକାର୍ତ୍ତା ଠାରେ ଅନୁଷ୍ଠିତ
ଏସିଆନ ଗେମ୍ସରେ ଭାରତର ଫୌଦ ମିର୍ଜା ଅଶ୍ୱ
ଚାଳନାର ବ୍ୟକ୍ତିଗତ ଇଭେଣ୍ଟରେ ରୌପ ପଦକ
ଜିତିଥିଲେ । ଏହାବାଦ ଟିମ ଇଭେଣ୍ଟରେ
ରାକେଶ କୁମାର, ଆଶିଷ ମଲିକ, ଜିତେନ୍ଦ୍ର ସିଂହ
ଓ ମିର୍ଜା ମିଳିତ ଭାବେ ବ୍ରୋଞ୍ଜ ପଦକ ହାତେଇ
ଥିଲେ । କିନ୍ତୁ ୧୯୮୨ ପରେ ଦେଶକୁ ସ୍ୱର୍ଣ୍ଣ
ମିଳି ନଥିଲା ।
ଅଶ୍ୱ ଚାଳନାରେ ଭାରତ ଆଜି ସ୍ୱର୍ଣ୍ଣ ଜିତିବା
ପରେ ଦେଶର ପଦକ ସଂଖ୍ୟା ୧୪କୁ ବୃଦ୍ଧି
ପାଇଛି । ଏଥିରେ ୩ଟି ସ୍ୱର୍ଣ୍ଣ, ୪ଟି ରୌପ୍ୟ ଓ
୭ଟି ବ୍ରୋଞ୍ଜ ପଦକ ରହିଛି ।
ଆଜି ଗୋଟିଏ ଦିନରେ ଭାରତ ଗୋଟିଏ
ସ୍ୱର୍ଣ୍ଣ, ଗୋଟିଏ ରୌପ୍ୟ ଓ ଗୋଟିଏ ବ୍ରୋଞ୍ଜ
ପଦକ ଜିତିଛି । ଆଜି ଅଶ୍ୱ ଚାଳନାରେ ସ୍ୱର୍ଣ୍ଣ
ମିଳିଥିବା ବେଳେ ପୋତଚାଳନାରେ ନେହା
ଠାକୁର ରୌପ୍ୟ ପଦକ ଜିତିଥିଲେ । ସେହିପରି
ପୁରୁଷ ୱିଣ୍ଡ ସଫର ଇଭେଣ୍ଟରେ ଭାରତର
ଇବାଦତ ଅଲୀ ବ୍ରୋଞ୍ଜ ପଦକ ଜିତିଛନ୍ତି ।