ନୂଆଦିଲ୍ଲୀ: ଆଦିତ୍ୟ ମିଶନର ସଫଳ
ଉତକ୍ଷେପଣ । ଏହି ସଫଳତା ସହ ସୂର୍ଯ୍ୟଙ୍କ ଉପରେ
ଅନୁଧ୍ୟାନ କ୍ଷେତ୍ରରେ ଆଉ ପାଦେ ଆଗେଇଛି ଇସ୍ରୋ ।
ଶ୍ରୀହରିକୋଟା ସତୀଶ ଧାବନ ଲଞ୍ଚ୍ ପ୍ୟାଡରୁ ସଫଳତା
ପୂର୍ବକ ଉତକ୍ଷେପଣ ହୋଇଛି ଆଦିତ୍ୟ-ଏଲୱାନ୍ ।
ରକେଟ ପିଏସଏଲଭି-ସି୫୭ ମାଧ୍ୟମରେ ମହାକାଶକୁ
ଯାଇଛି ଏହି ମହାକାଶଯାନ । ପୂର୍ବ ନିର୍ଦ୍ଧାରିତ ସମୟ
ଅନୁସାରେ ଆଜି ପୂର୍ବାହ୍ନ ୧୧ଟା ୫୦ ମିନିଟରେ
ଆଦିତ୍ୟ-ଏଲୱାନ୍ ଉତକ୍ଷେପଣ କରାଯାଇଛି । ଏହି
ମିଶନ୍ ମାଧ୍ୟମରେ ଅନେକ ଲକ୍ଷ୍ୟ ରଖିଛି ଇସ୍ରୋ ।
ଚନ୍ଦ୍ରଯାନର ସଫଳ ଯାତ୍ରା ପରେ କିପରି ସୌର ମିଶନ
ସଫଳ ହେବ ସେଥିପାଇଁ ବୈଜ୍ଞାନିକଙ୍କ ସମେତ ପୂରା
ଦେଶବାସୀ ଆଶାବାଦୀ ଅଛନ୍ତି । ଉତକ୍ଷେପଣର ୧୨୭
ଦିନ ପରେ ଲକ୍ଷ୍ୟପଥରେ ପହଞ୍ଚିବ ଆଦିତ୍ୟ-ଏଲୱାନ୍ ।
ଅର୍ଥାତ୍ ବୈଜ୍ଞାନିକମାନେ ଯେଉଁ ରହସ୍ୟ ଜାଣିବାକୁ
ଆଶା ରଖିଛନ୍ତି ତାହା ଆଗାମୀ ୪ ମାସ ପରେ ଅର୍ଥାତ୍
ଜାନୁଆରୀରେ ପୂରା ହୋଇପାରିବ । କାରଣ, ବର୍ତ୍ତମାନ
ଆଦିତ୍ୟ-ଏଲୱାନ୍ କକ୍ଷପଥରେ ଅବସ୍ଥାପିତ ହେବ ।
ସେଠାରୁ ପୃଥିବୀକୁ ଚାରି ଥର ପରିକ୍ରମା କରି ଲକ୍ଷ୍ୟ
ସ୍ଥଳ ଲାଗ୍ରାଞ୍ଜ ପଏଣ୍ଟ ଦିଗରେ ଅଗ୍ରସର ହେବ । ଏହା
ପରେ ହାଲୋ ଅର୍ବିଟରେ ରହି ସୂର୍ଯ୍ୟଙ୍କ ଉପରେ
ଅନୁଧ୍ୟାନ କରିବ । ଲାଗ୍ରାଞ୍ଜ ପଏଣ୍ଟର ଚତୁର୍ପାଶ୍ୱକୁ ହାଲୋ
ଅର୍ବିଟ ବୋଲି କୁହାଯାଏ । ଆଦିତ୍ୟା-ଏଲୱାନ ସମ୍ପୂର୍ଣ୍ଣ
ରୂପେ ସୂର୍ଯ୍ୟଙ୍କ ନିକଟକୁ ଯିବ ନାହିଁ । ଏହା ପ୍ରଥମ
ଲାଗ୍ରାଞ୍ଜ ପଏଣ୍ଟରେ ରହି ଅନୁଧ୍ୟାନ କରିବ । ପୃଥିବୀଠୁ
ସୂର୍ଯ୍ୟଙ୍କ ଦୂରତା ୧୫ କୋଟି କିଲୋମିଟର ହୋଇଥିବା
ବେଳେ ଏହା ୧୫ ଲକ୍ଷ କିଲୋମିଟର ଦୂରରୁ ରହି
ଅନୁସନ୍ଧାନ କରିବ । ଏହି ପଏଣ୍ଟକୁ ଲାଗ୍ରାଞ୍ଜ ପଏଣ୍ଟ
ବୋଲି କୁହାଯାଏ । ପୃଥିବୀ ଓ ସୂର୍ଯ୍ୟ ମଧ୍ୟରେ ପାଞ୍ଚଟି
ଲାଗ୍ରାଞ୍ଜ ପଏଣ୍ଟ ରହିଛି । ପ୍ରଥମ ଲାଗ୍ରାଞ୍ଜ ପଏଣ୍ଟର
ଦୂରତା ୧୫ ଲକ୍ଷ କିଲୋମିଟର । ଲାଗ୍ରାଞ୍ଜ ପଏଣ୍ଟ ହିଁ
ପୃଥିବୀ ଓ ସୂର୍ଯ୍ୟ ମଧ୍ୟରେ ଥିବା ଏକ ସ୍ଥାନ, ଯେଉଁଠାରେ
ଦୁଇ ବସ୍ତୁ ମଧ୍ୟରେ ମାଧ୍ୟାକର୍ଷଣ ଶକ୍ତି କାମ କରିଥାଏ ।