ଆଜିର ସମାଜରେ ଯେତେବେଳେ ପୁଅ ବଡ ହେଲା ପରେ ମାଆବାପାଙ୍କୁ ପର କରିଦେଉଛି, କେଉଁଠି ମାଆକୁ ମାଡ ମାରିବାର ଖବର ଆସୁଛି ସେତେବେଳେ ୟୁପିରୁ ଆସିଥିବା ଏ ମମତାଭରା ଚିତ୍ର ଅନ୍ୟକୁ ପ୍ରେରଣା ଦେବ ନିଶ୍ଚିତ । ହୁଏତ ମାଆଙ୍କ ପ୍ରତି ତାଙ୍କର ପ୍ରଗାଢ ଭଲପାଇବା ତାଙ୍କୁ ଏମିତି ଯାତ୍ରା ପାଇଁ ପ୍ରେରଣା ଦେଇଛି ଯାହା ଅନ୍ୟମାନଙ୍କ ପାଇଁ ଅସମ୍ଭବ ।
ପାଦରେ ଚପଲ, ମୁଣ୍ଡରେ ପଗଡି, ଦେହରେ ଧଳା ପାଇଜାମା ପିନ୍ଧି ବୃଦ୍ଧା ମାଆକୁ ବଦଳଗାଡି ନିଜେ ଟାଣି ଟାଣି ପ୍ରୟାଗରାଜ କୁମ୍ଭମେଳା ବୁଲାଇବାକୁ ଘରୁ ବାହାରି ଯାଆନ୍ତି ଉତ୍ତରପ୍ରଦେଶ ମୁଜାଫରନଗର ମେଘପୁର ଗାଁର ୬୫ ବର୍ଷୀୟ ସୁଦେଶ ପାଲ୍ ମଲ୍ଲିକ । ଶୀତ ଦିନ, ବାଟ ବାଟିକା ବିପଦ, ତଥାପି ମାଆର ମମତା ଆଗରେ ସେସବୁକୁ ଭୁଲି ନିଜେ ଘରଠୁ ୭୦୦ କିମି ଚାଲି ଚାଲି ମହାକୁମ୍ଭ ପାଇଁ ବାହାରିଛନ୍ତି । ଆଉ ସୁଦେଶଙ୍କୁ ଯିଏ ବାଟରେ ଦେଖୁଛି ମାଆଙ୍କ ପ୍ରତି ଥିବା ତାଙ୍କର ଭଲପାଇବା ଏବଂ ପୁଅପଣିଆକୁ ପ୍ରଶଂସା କରୁଛି । ଆଉ କହୁଛି ସତରେ ତୁମେ ଏ ଯୁଗର ଶ୍ରବଣ କୁମାର ।