ମାଳଦ୍ୱୀପ: ଭାରତ ବିରୋଧରେ ଜୋରସୋରରେ ବର୍ଷୁଥିଲେ ମାଳଦ୍ୱୀପ
ରାଷ୍ଟ୍ରପତି ମହମ୍ମଦ ମୁଇଜୁ । ଏମିତିକି ରାଷ୍ଟ୍ରପତି ନିର୍ବାଚନ ପୂର୍ବରୁ ଭାରତ
ବିରୋଧୀ ନାରା ଦେଇଥିଲେ । ଭାରତୀୟ ସେନାକୁ ମାଲଦ୍ୱୀପରୁ ହଟାଇ
ଦିଆଯିବ ବୋଲି କହି ସେ ମାଳଦ୍ୱୀପର ରାଷ୍ଟ୍ରପତି ନିର୍ବାଚନ ଜିତିଥିଲେ ।
ହେଲେ ଏବେ ରାଷ୍ଟ୍ରପତି ହେବା ପରେ ମହମ୍ମଦ ମୁଇଜୁଙ୍କ ଅକଲ
ପଶିଛି । କେତେ ଚୁନାରେ କେତେ ପିଠା ହୁଏ ସେ ଜାଣିପାରିଛନ୍ତି ।
ଭୌଗଳିକ ସ୍ଥିତି, ସମସ୍ୟା ଓ ମାଳଦ୍ୱୀପର କରାମତି ଜଣିସାରିବା ପରେ
ଏବେ ମୁଇଜୁଙ୍କର ଭାରତ ବିରୋଧୀ ସ୍ୱର ଦବିଯାଇଛି । ଏବେ କହୁଛନ୍ତି
ଆମେ ଭାରତ ସହ ମିଶି କାମ କରିବୁ । ରାଷ୍ଟ୍ରପତି ଚେୟାରରେ ବସିବା
ପରେ ମୁଇଜୁ କହିଛନ୍ତି ଯେ ଭୌଗଳିକ ମାଳଦ୍ୱୀପ ଏକ ଛୋଟ ଦେଶ
ହୋଇଥିବାରୁ ଏକାକୀ ଭୂରାଜନୈତିକ ପ୍ରତିଦ୍ୱନ୍ଦ୍ୱିତାର ସାମ୍ନା କରିପାରିବ
ନାହିଁ । ତେଣୁ ଆମକୁ ଭାରତ ସହ ମିଶି କାର୍ଯ୍ୟ କରିବାକୁ ହେବ । ଆମେ
ସବୁ ଦେଶ ସହ ମିଶି କାମ କରିବୁ । ଏମିତିକି ଉଭୟ ଭାରତ ଓ ଚୀନ
ସହ ମିଶି କାର୍ଯ୍ୟ କରିବୁ ବୋଲି ମହମ୍ମଦ ମୁଇଜୁ କହିଛନ୍ତି ।
ନ୍ୟୁଜ୍ ଏଜେନ୍ସି ଏଫ୍ପିକୁ ସାକ୍ଷାତ୍କାର ଦେଇ ମୁଇଜୁ କହିଛନ୍ତି ”
ଭୂରାଜନୈତିକ ଶତ୍ରୁତାକୁ ସାମ୍ନା କରିବାକୁ ମାଳଦ୍ୱୀପ ଖୁବ୍ ଛୋଟ
ଦେଶ । ଏଥିରେ ମାଳଦ୍ୱୀପର ଥିବା ବୈଦେଶିକ ନୀତି ଉପରେ
ହସ୍ତକ୍ଷେପ କରିବାକୁ ମୁଁ ବେଛି ଇଚ୍ଛୁକ ନୁହେଁ ।“ ୪୫ ବର୍ଷୀୟ ମହମ୍ମଦ
ମୁଇଜୁ ଗତ ଶୁକ୍ରବାର ଦିନ ମାଳଦ୍ୱୀପର ରାଷ୍ଟ୍ରପତି ଭାବେ ଶପଥ
ନେଇଛନ୍ତି । ଶପଥ ନେବା ପରେ ସେ କହିଛନ୍ତି “ଆମେ ସବୁ ଦେଶ
ସହ ମିଶି କାର୍ଯ୍ୟ କରିବୁ । ଭାରତ ଚୀନ ସମେତ ଅନ୍ୟ ଦେଶମାନଙ୍କ
ସହ ବି ମିଶିବୁ ।” ଅକ୍ଟୋବର ମାସରେ ମୁଇଜୁ ବ୍ଲୁମବର୍ଗକୁ ଏକ
ଇଣ୍ଟରଭ୍ୟୁ ଦେଇ ଭାରତ ସେନା ହଟାଇବା କଥା କହିଥିଲେ । ମାଳଦ୍ୱୀପ
ଭାରତ ସହ ମିଶି ସେନା ହଟାଇବା ଦିଗରେ କଥାବାର୍ତ୍ତା ଆରମ୍ଭ କରି
ଦେଇଛି ବୋଲି କହିଥିଲେ । ହେଲେ କଥାକୁ ମାସଟିଏ ବି ପୂରିନି
ମୁଇଜୁ ନିଜ ଦେଶର କରାମତି ଜାଣି ଭାରତ ହାତ ଛାଡ଼ିବେ ନାହିଁ
ବୋଲି ନିଷ୍ପତ୍ତି ନେଇଛନ୍ତି ।