ହାଙ୍ଗଝୌ, ୫ ।୧୦: ଚୀନରେ ଚାଲିଥିବା
ଏସୀୟ କ୍ରୀଡ଼ାରେ ଇତିହାସ ରଚିଛନ୍ତି
ଭାରତର ଦୁଇ ବ୍ୟାଡମିଣ୍ଟନ ଖେଳାଳି
ସାତ୍ତ୍ୱିକସାଇରାଜ ରଙ୍କିରେଡ୍ଡୀ ଓ ଚିରାଗ
ଶେଟ୍ଟୀ ।
ଆଜି ପୁରୁଷ ଡବଲ୍ସର କ୍ୱାର୍ଟର
ଫାଇନାଲରେ ସିଙ୍ଗାପୁରର ନେ ଜୋ ଜେ ଓ
ଜୋହାନ ଜୋୟୋଙ୍କ ଯୋଡ଼ିକୁ ୨୧-
୭,୨୧-୯ରେ ପରାସ୍ତ କରି ସେମି
ଫାଇନାଲରେ ପହଞ୍ଚିଛନ୍ତି ସାତ୍ତ୍ୱିକ ଓ ଚିରାଗ ।
ଏହା ସହିତ ଏକ ପଦକ ନିଶ୍ଚିତ କରିଛନ୍ତି
ଏହି ଯୋଡ଼ି ।
ସାତ୍ତ୍ୱିକ ଓ ଚିରାଗ ଏହି ଇଭେଣ୍ଟର
ଫାଇନାଲରେ ପ୍ରବେଶ କରି ଏକ ପଦକ ପକ୍କା
କରିବା ସହିତ ସେମାନଙ୍କ ନାଁରେ ଏକ
ରେକର୍ଡ ଯୋଡ଼ିଛନ୍ତି । ଏସୀୟ କ୍ରୀଡ଼ା
ଇତିହାସରେ ବ୍ୟାଡମିଣ୍ଟନ ପୁରୁଷ ଡବଲ୍ସ
ଇଭେଣ୍ଟର ସେମି ଫାଇନାଲରେ ପ୍ରବେଶ
କରିବାରେ ସେମାନେ ହେଉଛନ୍ତି ଦ୍ୱିତୀୟ
ଭାରତୀୟ ଯୋଡ଼ି ।
ଏହା ପୂର୍ବରୁ ୪୧ ବର୍ଷ ତଳେ ଅର୍ଥାତ୍
୧୯୮୨ରେ ଭାରତର ଲେରୟ ଡି’ସା ଓ
ପ୍ରଦୀପ ଗାନ୍ଧନେ ଏସୀୟ କ୍ରୀଡ଼ାରେ
ବ୍ୟାଡମିଣ୍ଟନ ପୁରୁଷ ଡବଲ୍ସ ଇଭେଣ୍ଟର ସେମି
ଫାଇନାଲରେ ପ୍ରବେଶ କରିଥିଲେ ।
ଶୁକ୍ରବାର (ଆସନ୍ତାକାଲି) ସାତ୍ତ୍ୱିକ ଓ
ଚିରାଗ ସେମି ଫାଇନାଲରେ ମାଲେସିୟାର
ଏରୋନ ଚିଆ ଓ ସୋ ୱି ଇକ ଯୋଡ଼ିଙ୍କୁ
ଭେଟିବେ । ଏଥିରେ ସାତ୍ତ୍ୱିକ ଓ ଚିରାଗ
ହାରିଲେ ମଧ୍ୟ ବ୍ରୋଞ୍ଜ ପଦକ ପାଇବେ ।
ଭାରତ ଚଳିତ ଏସୀୟ କ୍ରୀଡ଼ାରେ ୮୬ଟି
ପଦକ ଜିତିସାରିଛି । ତା’ ମଧ୍ୟରେ ୨୧ଟି
ସ୍ୱର୍ଣ୍ଣ, ୩୨ଟି ରୌପ୍ୟ ଓ ୩୩ଟି ବ୍ରୋଞ୍ଜ
ପଦକ ରହିଛି ।